Hopi adulto mayor ta cay den depresion --- ORANJESTAD (AAN) —Tin fuerte indicacion cu e necesidad pa crea mas cas pa personanan di edad avanza,
ta mas grandi cu nunca aworaki, y cu hopi hende ta buscando lugar pa hiba sea nan mayornan, welo, wela, of un tanta cu nan tabata cuida den nan cas, na un hogar pa hende grandi, pasobra pa un of otro motibo nan no por percura pe mas.
E ta un realidad hopi tristo, ya cu ta parce cu den su mayoria e grandinan aki no por zorg pa nan mes mas tampoco. Den casnan pa nos grandinan cu gobierno ta subsidia, aparentemente tin lista di spera, y den casnan priva no tur tin lugar, ya cu nan capacidad ta, relativamente, limita.
Segun fuente di informacion, hopi di e grandinan aki ta cay den un depresion horible, pasobra nan sa cu nan ta bira un problema, ta sinti incomodo y ta puntra nan mes “kico lo pasa cu mi? Unda lo mi bay”?. Nan ta sinti comosifuera nan ta un estorbo pa nan famia (incluyendo un ke otro yiu), debi cu, entre otro, nan no por aporta suficiente na e cas pasobra nan forza fisico a merma y nan ta haya un pension di AOV, masha chikito tambe, of si ta hende viudo, asina mes nan no por cubri cierto gastonan, tin caso unda cu e partner cu a fayece a laga debe di impuesto y e pension tin beslag riba dje, y asina tin diferente situacion cu ta haci e bida di varios di nos grandinan, di un calidad minimo.
E otro situacion cu ta presenta ta e demencia senil, cu hopi famia no sa con pa maneha esaki. Y tampoco den tur cas di anciano priva, tin suficiente personal acredita pa yuda e grandinan aki, pasobra e ta un responsabilidad hopi fuerte pa nan.
Esaki ta un tema bastante delicado, pero un fuente di informacion a trece dilanti pa concientiza comunidad, cu conforme añanan ta pasa mas grandi e grupo di personanan di edad avanza ta bira, y cu no ta tur ta yega na edadnan mas halto cu 70 pa 80 aña y hasta mas den bon tino, y cu por percura pa nan mes.
Tin casonan admirable si, di hende grandi cu gran fortaleza fisico y mental cu ta logra y hasta no ta parce cu nan tin un edad asina halto, y tambe tin famianan cu pa nada di mundo ta saca nan grandinan di nan zona di confort, y tur ta colabora pa dune e atencion cu mester, pero di otro banda tin circumstancianan desfavorabel cu no ta permiti otro famianan tuma nan grandinan over y cuida nan y tin cu busca lugar pa hiba nan.
Y mas tristo ta, cu cierto famianan despues di algun siman, no ta ni puntra mas pa nan ser keri, cu no ta biba mas den su zona di confort y cu den un epoca kizas no tan lehano si tabata percura den tur sentido, pa yuda nan famia.
