Hopi empresa ta traspasando aumento na e consumidor --- *Prijs di azeta y trigo tambe a subi
ORANJESTAD (AAN): Manera DIARIO a bin ta treciendo dilanti, sino ta pa entre otro, e problematica pa motibo di e prijs halto di flete internacionalmente ta pa motibo di e caos den e cadena di suministro cu e prijs di hopi producto a subi den e ultimo lunanan y parce cu esaki tambe lo mantene den e lunanan benidero.
Organisacion di Nacionnan Uni (UN) a duna di conoce e prijsnan mundial di e alimentonan a subi na e nivel mas halto den mas di un decada, esaki como consecuencia di un demanda halto y cosechanan mediocre.
E prijsnan a aumenta pa di tres luna consecutivo na October den un 3% compara cu September, segun un indica publica pa e Organisacion di Nacionnan Uni pa e Agricultura y Alimentacion (FAO). E ganashinan a wordo impulsa pa e aumento fuerte den e prijsnan di azeta vegetal y trigo.
Na Aruba, por ehempel, por a constata con hopi persona riba rednan social tabata keha di e prijs di azeta y awor ta conoci e motibonan.
E indice di prijs di alimentonan di FAO ta analisa e cambionan pa luna den un variedad di productonan alimenticio. E indice aki a aumenta mas cu 30% durante 2020. Y awor esaki ta den su nivel mas halto desde Juli 2011, segun e organisacion.
E prijs di trigo, a aumenta den 5% na October pa motibo di e reduccion di e cosechanan di e exportadornan principal, inclui Canada, Rusia y Merca. Tambe a aumenta e prijs di aroz y maishi.
E prijsnan mas firme ta esunnan di e azetanan di palm (palm oil), soy y girasol locual a trece cu ne e aumento di 9,6% den e indice di prijs di e hortalizanan di FAO. E prijs di e azeta di palm a subi debido na e preocupacionnan riba e produccion abao na Malaysia pa motibo di e scarcedad di trahadornan migrante.
FAO a referi na e demanda mundial halto di un variedad di productonan manera "lechi den puiro", pahranan di granha, azetanan vegetal y cebada.
E suministronan y e prijsnan di e alimentonan ta bao presion pa e clima extremo, e cadenanan di suministro complica, e scarcedad di trahadornan y e aumento di e costonan.
Ta bon pa agrega tambe cu e supermercadonan di algun di e economianan principal a confronta problemanan pa mantene nan shelfnan completamente yen durante algun momento di e pandemia.
Siman pasa, e Ministerio di Comercio di China a emiti un comunicado riba e almacenamento di alimentonan cu a provoca panico den e publico. E aviso a ordena e autoridadnan local pa sigura cu e ciudadanonan por tin un "suministro adecua" di productonan basico e winter aki y pa mantene stabil e costo di e alimentonan.
Manera por constata e aumento den prijs di e productonan alimenticio ta treciendo cu ne costonan mas halto pa e empresanan di bienes di consumo, y algun di esakinan ta traspasando e aumento di prijs na e compradornan. Por ehempel, Unilever, Kraft Heinz y Mondelez a subi e prijs di productonan popular.
Sinembargo, banda di esaki por tin otro situacion den algun area.
E caida di e demanda di porconan na China a yuda impulsa e indice di prijsnan di carni di FAO na su di tres descenso mensual consecutivo. E prijs di sucu a cay na October despues di a aumenta durante seis luna sigui.
Cu e panorama aki por tin un bista riba loke por spera aki na Aruba y riba loke a aumenta caba den e ultimo lunanan.
Awor cu e temporada di Pasco y Fin di aña, e consumidor lo cuminsa ripara con prijsnan a subi compara cu e añanan prome cu Covid.
