Tin di prepara pasobra e di dos Ola di Inflacion a yega

Analista Simon Waslander ta adverti

ORANJESTAD (AAN): Den un articulo exclusivo pa DIARIO titula “Un ola nobo di Inflacion na caminda y factornan local y internacional ta culpabel” (16 di November 2023), e analista local Simon Waslander a splica cu si e nivel di interes di Estados Unidos baha, cu esaki lo probablemente causa e di dos ola grandi di inflacion mundial. Den e articulo ey, el a haci e pronostico cu interes lo cuminsa baha den forma fuerte e siguiente luna benidero.

   Ta solamente 1 luna a pasa desde e articulo aki y awo oficialmente e US Federal Reserve, (FED) esta e Banco Central di Merca, a indica via nan publicacion official cu nan lo verwacht di baha interes cu full 1 punto di porciento na 2024, y pa haci mesun cos na 2025 tambe.

   Pa e FED propone di baha interes siendo cu nivel di inflacion ainda ta na un nivel eleva, ta algo cu solamente a pasa 5 biaha den historia monetario, esta den recesionnan severo of den caso di Segundo Guerra Mundial.

   Pero di con FED lo baha interes sabiendo cu e riesgo di un segunda ola (grandi) di inflacion ta hopi real? Wel, simplemente pasobra gobiernonan full rond di mundo tin demasiado debe y deficitnan grandi y no por wanta un nivel di interes halto pa un periodo largo.

   Compara cu 2007 ta casi tur gobierno rond mundo ta para hopi mas pio fiscalmente na 2023. E problema structural aki ta pone presion enorme riba Banconan Central pa baha interes sabiendo 100% cu esaki lo un bez mas eleva inflacion.

   Pa mas detaye riba pronostico di e di dos ola di inflacion, nos por wak e periodo di 1970 pa 1980 na Estados Unidos. Unda casi precisamente mesun cos a pasa. Un prome ola di inflacion a surgi, Banconan Central den respons a hisa interes. Pa despues baha interes mucho trempan prome cu e inflacion tabata echt bao control causando un segunda ola di inflacion di un tamaño gigantesco.

   Si bo keda wak historia, e situacion fiscal y nivel di debe full rond mundo y cu tin mas cu 8 triyon US Dollars den fondonan di liquidez. Ta pone e analista aki bin na e conclusion cu e segunda ola di inflacion ta inminente y cu te hasta e lo ta pio cu e prome ola cu nos a wak den e delaster 2 aña.