ORANJESTAD (AAN): Ta parce cu tin algun hende cu no ta sigui noticia, no ta sigui ningun desaroyo, pero ta cla pa critica!
Ya caba Diaranson tabatin algun persona ta critica cu e barco di Celebrity Millennium a yega Aruba, pero loke nan ta desribi como “poco pasahero abordo”.
Siendo cu di trempan caba DIARIO a anuncia cu ta solamente 548 pasahero tin riba e barco aki. Y esaki no ta un escogencia di e linea crusero, sino ta ‘guidelines’ cu e.o. CDC di Merca a stipula pa e cruseronan.
Tin di reduci e capacidad abordo pa asina por garantiza cu hendenan por mantene distancia fisico, y tambe evita aglomeracion.
E barco di Celebrity Millennium tin capacidad pa 2.218 pasahero. Pero aworaki e ta transportando solamente 24,7% di su capacidad. Y esaki ta algo cu pa awor en adelante tur hende tin di compronde.
Aunke a nota cu mainta tin hopi di e pasaheronan crusero cu a cana rond sin cumpra nada. Pero ta atardi ora cu nan caba di cana rond, of finaliza cu tour, e ora en general nan tin man bashi pa asina bay cana rond y cumpra souvenirs of otro mercancia. Tin un pareha turista di barco cu hasta a acudi na un negoshi pa asina nan por a drecha e man di su bril.
Aki por mira con esnan na kiosconan di Souvenir tabata yuda e pasaheronan turista cu despues di 15 luna ta bek riba e isla.