ORANJESTAD (AAN): CEO di Oficina di Turismo, Ronella Croes a duna di conoce cu tin varios aspecto cu tambe ta haya atencion pa e siman y lunanan cu ta sigui. Esaki ta e parti di e medidanan di parti di e cluster comercial y di turismo.
Croes a bisa cu nan ta sumamente satisfecho y agradecido pa e oido cu a wordo duna pa sector di HORECA pa e diferente pasonan cu a wordo anuncia recientemente.
E peticion ta pa tur comerciante y clientenan tene cuenta cu ainda ta meymey di e pandemia y e crisis. Pero manera a anuncia caba ta cuminsa suavisa tambe pa stimula ainda mas e progreso economico considerando e progresando den e parti di salud, a remarca.
Ronella Croes a agrega cu ATA ta hopi contento cu e bishita di e prome barco crusero. Ta bon pa señala cu Aruba ta bao di e prome itinerario den Caribe cual ta ricibiendo bishita di un barco.
E noticia aki a haya atencion tambe di prensa internacional cu ta poniendo atencion na e reinicio di turismo crusero den Caribe. Esaki ta un beneficio pa Aruba tambe, e CEO di ATA a expresa.
ATA lo sigui traha riba normalisa tur cos y ta papia hopi di bay bek na 2019. Pero ta consciente cu mester sigui pone kisas mas atencion riba e aspectonan cu no kier pa bay bek na e normal bieu.
Akinan tin cu pensa riba e desaroyo turistico duradero cu tur ta para p'e, ya cu no ta un asunto di ATA so, pero ta hopi otro instancianan y comunidad completo. Tin diferente practica cu prome cu e pandemia tabata den discusion y cu ta mira ta bin bek atrobe.
"Pues, no mester laga un crisis tambe bay perdi sin cu bo ta gara e oportunidadnan y enseñansa di con e por ta diferente tambe. Incluso pensando aki riba bo recursonan natural, incluyendo bo playanan cu nos tur por a experencia, entre otro e bida marino tambe cu e regresa den gran forma y cosnan cu bo kier sigura cu lo por haci lo posibel pa por mantene tambe of mehora", e ehecutivo di ATA a declara.
