Tin cuater opcion pa restructuracion di salario di maestronan riba mesa, unda gobierno tin cu scoge

Presidente di SIMAR, Angelique Quijada:

ORANJESTAD (AAN) – Angelique Quijada, Presidente di Sindicato di Maestronan di Aruba “SIMAR”, a informa den entrevista cu DIARIO, cu diaranzon siman pasa nan tabata tin un reunion cu e Comision di Restructuracion di Salario di e maestonan, hunto cu Minister di Enseñanza, señor Endy Croes.

Presidente di SIMAR a señala cu e reunion tabata mas tanto pa wak si tur cos den e rapport administrativo ta ok, of si mester drecha algo, si mester bin cambio, y si tur cos ta ok mand’e pa DRH y Departamento Huridico, pa haya advies.

            Quijada a agrega cu SIMAR tabata tin diferente reunion cu e Comision y asina nan keda cla ta bay cerca su miembronan, pa informa nan cu kico SIMAR ta bezig cu ne, p’asina nan haya nan idea tambe.

            El a indica tambe cu locual tin den e advies ta loke e miembronan a bay di acuerdo cu ne. Tin cuater opcion cu Gobierno mester scoge cu e por carga financieramente. Y cu e cuater opcionnan cu tin e miembronan a bay di acuerdo cu nan. Tur esaki ta pa mehora e posicion huridico di e maestronan/docente. Nan a cuminza pa mehora esnan di mas abao, manera docentenan di Kleuterschool y scol basico. “Asina a cuminza cu nan lo haya un aumento, pero mi a combersa cu e Minister apart y mi a bise cu no mester ta pa nan so, pero mester ta completo; tur mester sinti un cambio. Anto e ora ey a bin e idea cu nos ta drecha pa tur, y nos a cuminza e ora ey hisa esnan di Kleuter cu Basis cu 4%, pero mester drecha e diferencia cu tin y e ora ey a haci esnan di mas abao 8%, despues esnan cu ta tweede graad ta haya 4%, esnan cu ta di Universidad y Eerste graad ta haya 4%. Esey ta e prome opcion cu tin. Pues, prome tabata pa kleuter cu Bassis”, Angelique Quijada a señala.

            E di dos opcion cu tin ta pa na luga di adapta salario cada dos aña haci’e cada aña. E di tres cu cuater opcion cu e miembronan di SIMA a trece, ta pa compara cu Bonaire y Hulanda. “Nan a bay dilanti, e ultimo diez añanan cu 40%. Nos miembronan a bisa pa nos ban al menos cu 20%, pues mitad di locual nan a haya. Pasobra asina nos ta keda perde nos docentenan; nan ta bay Hulanda cu tin asina tanto oportunidad, of ta bay Bonaire. E ora ey gobierno a acepta 20% pero no den un shot, pasobra por ta gobierno no por cargue asina, pero opcion 3 cu 4 sea den cinco of diez aña. Pues gobierno tin cu bay dicidi cual di e opcionnan cu tin na mesa cu tin advies ta bay ehecuta”, segun e presidente di SIMAR, Angelique Quijada.