Minister Arthur Dowers ta informa encuanto Aruparking
ORANJESTAD (AAN) Minister di Husticia, mr. Arthur Dowers, den conferencia di prensa a referi tambe na e proceso di control den trafico, cu ta tumando lugar den ciudad. Esaki den cuadro di funcionamento di Aruparking.
E dignatario a declara cu gobierno a cuminza cu e proceso di control bek den trafico, principalmente den centro di ciudad e ultimo lunanan. Tin biaha tin autonan hasta mal staciona cu ta stroba e Tram di pasa, y e ora trafico ta keda blokea.
“Nos a haci esaki pasobra, nos a bisa, cu tin un free for all, pa loke ta parkeo, y nos ta mira cu e ta crea riesgo adicional na momento cu ta blokea cierto areanan cu por ehemplo Polis, Brandweer, Brandweer no por yega den caso di emergencia. Y basa riba esey, a dicidi cu ta cuminza controla y mantene e orden publico tambe”, e dignatario a señala.
E mandatario a agrega cu den e periodo cu a pasa, cuminzando mas of menos tres luna pasa, polis a parti como 375 process verbal pa hendenan cu ta parkeer robes tur caminda, manera nan ta haya ta bon, y a takel 150 auto cu ta stroba trafico of ta parkeer di un forma cu ta crea un peliger pa e seguridad y continuidad di e mobilidad den centro di ciudad.
“T’asina ey cu nos a mira, despues cu a cuminza cu control, cu tin un aumento di esnan cu ta paga pa parkeo den e area di Oranjestad, y tambe nos a mira un aumento di personanan cu a abona riba un carchi pa nan tin e posibilidad di haya un lugar di para nan auto. Nos, na e momento aki tin scarcedad, claro mirando e cantidad di bishita cu nos tin den e area di Oranjestad”, Minister Dowers a indica.
El a agrega cu t’asina aki cu tin, den e area di ex-DOW, of caminda tabata abattoir, unda Arubus tin un stacionamento cu hende por para auto y cana bin te Oranjestad y e ta invita esnan cu no por, of no kier paga, pa haci uso di e parkeonan aki, cu ta gratis.
