Un reto extra pa SVb pa cobra subsidio duna di mas:
ORANJESTAD (AAN) – Edwin Jacobs, Director di SVb, den conferencia di prensa, a sigui bisa cu na Banco di Seguro Social nan ta nota cu tin companianan cu ta duna reto na nan, ora di duna placa. Por ehemplo, e empresanan cu ta exonera di BBO, pero cu tin obligacion di declara esaki, pero no a hacie.
El a splica cu di companianan cu ta forma parti di un holding, loke ta conoci como unidad fiscal, tabata dificil pa SVb haya informacion adelanta, pero toch ta asina leu cu SVb a haya informacion unda tambe tin algun reto cu ne.
“Nos tin tambe algun reto cerca companianan cu ta exonera pa paga BBO, pero nan tin obligacion di declara esaki. Anto, desde cu BBO a wordo introduci, nunca e companianan aki a declare y nunca a bin for di parti di gobierno un aviso cu nan tin cu declara esaki, y cu nan no por lague habri”, Jacobs a señala, agregando: “Esey ta e situacion cu a pone un poco reto pa nos den e proceso.
Na December nos a bay Parlamento, hunto cu Minister di Finanzas y Minister di Economia, pa loke ta trata e Landsverordening pa cu e loonsubsidie.
Den e reunion ey Parlamento, corectamente, a pidi SVb pa presenta con ta e intencion pa bay cobra esnan cu a ricibi subsidio di mas. Nos a presenta nan un bista di con nos ta bay cobra esaki bek, caminda nos a indica cu si e debe ta entre mil y menos cu mil florin, nos ta duna e compania dos luna pa paga esaki. Entre mil cu diez mil florin, seis luna asina te cu nos a yega 24 luna. Parlamento a mustra su parti positivo pa cu e eskema aki pa recupera e subsidio paga di mas”, Edwin Jacobs a relata.
