Tin cambionan tumando lugar na DPS internamente y na scolnan pa haci cosnan diferente y miho

Ivan Croes, director DPS:

ORANJESTAD (AAN) – Ivan Croes, director di DPS (Departamento di Scolnan Publico),  den entrevista cu DIARIO a elabora tocante e desafionan cu e Departamento aki tin su dilanti.

DPS como kantoor mes kier duna e servicio na e maestronan. Hopi biaha por scucha cu DPS no ta atende telefon, entre otro. Y tur e cosnan aki ta hibando DPS na un cambio unda nan kier brinda servicio na su personal.

Croes a sigui bisa cu si e personal ta contento, ta bay scucha hopi mas feed bek for di nan, cu e Departamento por bisa “ok. Tin cosnan pa drecha”.

Di parti di scol mes, nan ta puntra kico nan por haci diferente. Ultimo tempo DPS ta dunando hopi informacion na e hobennan con pa sigui studia. “Nos ta bezig ta post hopi informacion riba nos facebook page, pa mustra cu tin un era nobo. Nos kier haci algo diferente; por ehemplo ora bo ta bisa e mucha bay lesa aworaki, e ta bisa cu lesamento no ta su cos. Pero scol tin cu wak un otro manera cu por haya pa logra pa e mucha lesa. Por ehemplo haya un licencia di un ‘Nieuwsbegrip’ unda nan por lesa historianan actual cu a pasa siman pasa, rond mundo, pero nan ta lesa y compronde. Bo tin cu haci cosnan diferente pa haya e muchanan ‘onboard’ den e caso aki”, Ivan Croes a relata.

Tocante enseñanza en general, señor Croes ta na haltura cu Minister ta cambiando e leynan, y si nan wordo actualiza lo por mira un mira un cambio mas grandi. El a bisa cu hopi biaha nan ta keda den cuadro di ley cu “no por haci esaki of esey” y ta bon si esey wordo cambia. Croes a indica cu gobierno a haci diferente ronda di consulta tambe. Nan sa e problema, aworaki e plannan tin cu wordo sigui, y esey ta sosodiendo awo. Tin hopi tema cu ta wordo trata y awor ta sigui e parti di e plan, con nan por trece mehoracion. “Esey ta den miras, pero cu e ta bay sosode? Si. Mi ta kere cu nos ta den un momento crucial y di awo padilanti lo bay ripara cambionan grandi den e caso aki”, Ivan Croes a remarca.

Finalmente, Ivan Croes a señala cu PDS ta satisfecho cu e cifranan cu tin ultimamente, special e studiantenan di examen klas. Semper tin espacio pa mehora, pero scolnan ta haciendo nan best pa mehora e cifranan y esey por mira cada final di aña escolar.