Tin basta reto ainda pa converti Cas Veneranda den un oficina moderno manera tin planea

Arkitecto Orlando Hoevertsz:

ORANJESTAD (AAN) – Den conferencia di prensa, Anne Witsenburg, directora di Stichting Monumentenfonds Aruba, a elabora tocante e Proyecto “Tales of Cas Veneranda”, y na prome lugar a bisa cu paso pa paso nan ta yegando na e restauracion y tin hopi trabao den e preparacion aki y pesey ta duna informacion den diferente rueda di prensa.

            Manera ta conoci Monumentenfonds a cumpra e cas, y señora Witsenburg a duna di conoce cu na e momentonan aki nan ta den e proceso cu notario pa e traspaso di e cas pa e Stichting.

            “Mientras tanto nos a cuminza cu e coleccion di historianan di e cas, di potretnan bieu, haci research y nos mester di e publico general di Aruba pa cu esaki. Nos tambe a scoge un arkitecto y Archidesign, cu manera nos a anuncia biaha pasa, ta señor Orlando Hoevertsz”.

            Seguidamente Arkitecto Orlando Hoevertsz a hiba palabra. Hoevertsz a bisa cu ta un honor su empresa a wordo elegi como Arkitecto di e bunita proyecto aki: Cas Veneranda. “Nos ta bezig actualmente e vooronderzoek.  Ora cu nos a haya e cas, full cera, tabata tin basta adicto ambulante rond y den di e cas aki, y a warda pa Monumentenfonds haci un bon limpieza tanto di e prome piso como abao sin haci daño na e edificio mes. Pues nos tin cu haci un investigacion ainda, kico ta original di e cas y kico a bin acerca, door cu e tabata tin diferente funcion”, Arkitecto Hoevertsz a splica y a indica cu mester a instala un bouwteam prome cu haci e destaho publico.

            El a menciona cu e mapa original ta di aña 1936 pero e cas original no a wordo traha exactamente manera e ta. Hoevertsz a splica di e diferencianan cu tin, algun cu no sa ki aña a wordo traha y na parti patras di e cas tabata tin diferente funcion manera un restaurant na añanan 80 y un discoteca tambe. Cierto cosnan a wordo traha den e cas cu no ta original y cu mester kita nan, entre otro.

            El a bisa cu tin hopi reto pa converti e cas aki den un oficina moderno, manera tin planea, y meter di e input di e bouwteam cu Monumentenfonds a instala.

            Esaki ta e status cu nan ta actualmente, y falta hopi den e luna di September pa caba cu tur e fase di vooronderzoek cu e mapanan original, y di eynan hunto cu e bouwteam nan ta bay pa e diseño definitivo pa e oficina nobo.