Tin atencion internacional pa e ‘Homenahe na Rembrandt’ di artista local Gustave Nouel

ORANJESTAD (AAN): Informacion for di Hulanda, ta indica cu Diadomingo 20 di Juli venidero, e pintor di Deventer,

esta Gustave Nouel (conoci awor como GN) tin e oportunidad atrobe pa comparti cu publico presente, como artista invita especial, su performance ‘Homenahe na Rembrandt’, den tecnica universal di pintornan riba caya.

   Esaki lo tuma luga riba plaza Grote Kerkhof, band’i  Lebuïnuskerk y dilanti Stadhuis di Deventer. Den ‘curazon’ di Deventer.

   Tin di corda cu su pintura-performance ‘Homenahe na Rembrandt’,  cu a ser presenta internacionalmente den pasado, e Arubiano ta sigui ricibi invitacion tanto local como internacional. Ainda performance ‘Homenahe na Rembrandt’ di GN tin atencion internacional.

   Paul Moerkerken, kende ta organisador y president di Fundacion Arte y Cultura na IJssel, kier purba transforma plaza Grote Kerkhof den un plaza manera na Place du Tertre di Montmartre, París, of den un plaza di artista manera na otro ciudadnan metropolitano of luganan turistico importante.

  Su obhetivo ta crea un plataforma nobo pa artista na Deventer, cu lo inclui tur disciplina artistico cu su fundacion ta promoviendo. Como parti di e iniciativa nobo aki, e organizador a hasta inclui un proyecto di pintura-performance ‘Homenahe na Rembrandt’, di un artista Arubiano, inspira p’e retratista mas famoso di tur tempo, Rembrandt van Rijn.

  Aparentemente ‘Homenahe na Rembrandt’ di GN ta den sintonía perfecto cu ambicion di e organizador y su fundacion.

   Fundacion 'Arte y Cultura na IJssel' ta ofreciendo desde cuminsamento di e iniciativa na 2024, un plataforma especial na e famoso pintor y artista Arubiano di Deventer Gustave Nouel (GN) cu su pintura-performance ‘Homenahe na Rembrandt’. Un plataforma regional, cu GN como invitado especial ta comparti cu miembronan di  Asociacion di Artista DAK, unda GN cu su formacion post-academico, ta guiando artista regional di tur nivel. Tambe e Arubiano ta comparti su experiencia y conocimento di ‘street-artist’ y pintor internacional, cu artistanan di DAK y di region. Artista di tur nivel cu pasion pa Arte, di aspirante te specialista,  hasta docente di arte y artista academico, ta miembro di DAK, caminda Gustave y algun otro artista/docente lider, a ser aserca pa guia nan colega artista pa nan por sigi specializa den diferente tecnica desea.

   Asociacion di artista DAK a acerca y contrata Gustave como asesor y docente lider algun aña pasa, principalmente pa su expertise den pintamento di portret riba caya. GN a comparti ‘secreto universal’ y 'triki', di artista riba caya na Kunstcircuit, cu tabata e Centro Cultural mas importante di region. Den su juventud, e artista-pintor Arubiano a traha cu pintor y artista di henter mundo riba caya y plaza, internacionalmente.

   Den Lebuïnuskerk, banda di plaza Grote Kerkhof, tambe lo tin un exposicion dje artistanan di DAK te dia 3 di Augustus. GN, como asesor/docente di DAK, tambe lo expone un pintura, 'curiosamente' titula: ‘Mi Homenahe na Rembrandt’.