ORANJESTAD (AAN): Tin un diferencia di opinion ultimo dianan aki entre gerencia di Lotto y algun rebendedor,
y e ta algo cu den pasado ya caba na varios ocasion e tipo di disputa aki a sali den publico, pero despues no a tende nada mas di dje.
A bin sali na cla cu aparentemente Lotto no ta desea pa nan rebendedornan ta sinta bende “otro” producto den nan negoshinan. Parce cu ni refresco, of boli, ni chuculati ta wordo permiti. Pasobra si un cliente cumpra number, y despues ta pidi pa refresco, etc., esaki ta bay “kita tempo” di e rebendedor envez di keda sinta ta sirbi clientenan cu ta para den rij.
Pesey algun rebendedor cu tabatin cooler di refresco den nan lugar, ya no tin esey mas.
Pero awor a bin un otro conflicto, esta cu rebendedornan a wordo adverti cu nan no mag di bende otro tipo di wega den nan negoshi. Aki ta referi na e popular weganan di Bingo cu ta ser hunga na TV.
Siendo cu Bingo ta un wega popular cu bo por hunga pa cash y premio. Weganan di Bingo ta wordo gana, ora cu e hungador su carchi ta match cu e bolanan cu ta aparece riba pantaya. Y pa bo participa na esaki, bo tin di cumpra e Carchi di Bingo di antemano na diferente lugar na Aruba, incluyendo algun rebendedor di Lotto.
Aparentemente esaki ta algo cu no ta permiti.
Rebendedornan no ta di acuerdo cu e punto di bista aki, pasobra nan ta mira cu bendemento di Carchi di Bingo no ta kita ningun extra seconde di nan tarea di bende loteria. Nan no mester ni lanta bay na un cashi of na un reki.
Ademas, e bendemento di Carchi di Bingo ta trece extra entrada pa nan por yuda paga huur di lugar, coriente, internet, etc.
DIARIO a ricibi indicacion cu varios di e rebendedornan aki a consulta caba cu otro, y nan ta haya cu esaki lo por bira un ‘test-case’ interesante si acaso nan hiba e caso aki dilanti Huez, pa laga un magistrado tuma decision si acaso nan ta violando reglanan, of si bendemento di Carchi di Bingo lo ta OK pa sigui cune bao di e circunstancianan.
Ta parce cu tur esaki ainda ta den un etapa inicial, pues ningun decision concreto a wordo tuma ainda pa asina bay lanta un Caso Sumario contra Lotto. Pues ta den consulta keto bay cu Abogado riba e probabilidad di esaki.
Y tambe lo tin di bay proba cu di berdad bendemento di Carchi di Bingo ta tuma asina hopi extra minuut di strobamento pa sigui atende cliente of no.
Ademas, si acaso un rebendedor “no mag di bende otro cos”, e ora con por permiti algun Minimarket, Gasoline-Station, Supermarket, y hasta Snackbar si bira rebendedor? Pues un Snackbar si mag di bende Hamburger y Pastechi, y tambe Lotto? E ta bira algo complica e ora ey si.
