Minister Arends a duna di conoce: --- *BCI ta bay ta hopi mas activo
ORANJESTAD (AAN): Minister Ursell Arends a laga sa cu el a bishita Bureau City Inspector y nan a informa cu cada bes nan ta hayando y mas y mas desperdicio cu ta wordo tira rond di Aruba.
El a agrega cu BCI ta bay ta e enforcement pa loke ta trata naturalesa y medio ambiente manera nan ta bin ta haci, pero tambe e ley di cacho. Ambos aspecto BCI lo bay atende cu nan.
Segun Minister Arends, Bureau City Inspector ta bay ta hopi mas activo. Ta duna nan e personal e hermentnan necesario pa asina nan por crea e concientisacion tambe den comunidad riba con pa atende cu e tema di desperdicio na Aruba.
Tira sushi unda nos ta haya bon ta crea un problema mas grandi como comunidad. Esaki ta algo cu Bureau City Inspector lo atende cu ne, a remarca.
Tin hopi reclamo rond di Aruba cu ta indica cu nan no ta mira sikiera e auto di BCI pasa den nan bario. Riba esaki, Minister Arends a señala cu BCI ta un team hopi dinamico y nan tin un director nobo cu un vision amplio.
Durante e reunion a duna e minister e lista di prioridadnan y aworaki e ministerio lo percura pa brinda nan esaki tambe pa nan por haci un tarea cu ta satisfactorio pa comunidad y cu e preocupacionnan ta wordo atendi, Minister Ursell Arends a indica.
El a agrega cu tin un ley na vigor y hopi biaha e problema ta cu BCI ta haya e desperdicionan aki, tin ora ta pasa door di nan apesar di tur e riesgonan pa nan tambe por swordo infecta of haya cualkier problema di salud.
Pero ora cu ta haya cosnan cu tin nomber di hende y ta bay puntra nan, nan ta bisa cu nan a paga un hende pa bay tira sushi afo y nan a "echa baina", a expresa.
"Esaki ta cosnan cu nos lo bay zorg pa atende cu ne tambe y den e cuadro legal atende cu a procesonan aki", a bisa.
