Minister di Salud y Asunto Social Mervin Wyatt-Ras:
*Na Aruba 1 di cada 200
ORANJESTAD (AAN)-- Minister di Salud y Asunto Social, drs. Mervin Wyatt Ras, a sigui splica den e Programa Nos Mainta, di Telearuba, cu e ta reconoce cu mester haci mas pa e personanan cu ta sufri di Epilepsia.
Na cuminzamento, e dignatario a bisa cu rond mundo, 50 miyon persona ta sufri di epilepsia y e por a compronde cu aki na Aruba, di cada 200 persona, por tin un cu Epilepsia, pero tin alrededor di 500 aworaki. Wit Gele Kruis tambe ta reconoce cu ta importante pa haci deteccion trempan ora e persona ta baby, y esey ta haci cu mester dedica mas atencion na dje. “Mi ta haya cu prome cu esaki nos no tabata mire asina como tal, y door cu e fundacion ta haciendo su trabao, mi ta kere cu ta importante pa nos reforza e fundacion p’asina duna mas reconocemento ora cu un persona ta bira malo y p’e acept’e manera cu e ta, y dune e sosten”, Minister Wyatt Ras a señala.
El a subraya cu mester haci mas na concientizacion y tambe pa e cuido, pasobra ora e persona ta chikito mester bay na un Neurologo, y nos ta trahando riba esey, pa nos por haya mas persona of docternan cu ta specializa den neurologia. “E ta dificil pa nos tin neurologo pa mucha tambe, dus, esey nos tin cu traha riba dje. Pues, nos tin diferente reto pa cumpli cu ne, mi no ta bisa ta un, dos, tres ta bay, pero en todo caso si bo tin wowo p’e, si bo ta conciente cu tin un parti di Salubridad cu tin cu pone atencion riba dje, bo ta bay hacie tambe”, Minister Wyatt-Ras a subraya.
El a agrega cu vooral mester garantiza cu e personanan aki, na momento cu nan haya atake, no ta, necesariamente, cu nan no por traha of cu nan no por tin un rol importante den comunidad, nan ta keda un persona.
“Mi a tuma nota tambe cu tin personanan cu ta funciona gewoon hopi bon den nan trabao, solamente cu nan coleganan sa, cu na momento cu e persona bira malo, nan mester keda calmo y yud’e. Kiermen, e no ta bay kibra e bida di e persona. Tin otro casonan cu si, tin efectonan mas grandi cu ta stroba e funcionamento diario di e pashent, y e ora ey si, bo mester duna nan e sosten. Tin personanan tin cierto uitkeuring, bijstand cu nan ta bin na remarca p’e. Kiermen, tin cierto grado di epilepsia y nos mester keda tog alerto como gobierno pa garantiza cu e persona cu mester, haya e ayudo y docter adecua pa nan por sigui participa den nos comunidad” e titular di Salud y Asunto Social a señala.
