Otmar Oduber ta cuestiona:
ORANJESTAD (AAN) – Otmar Oduber, den conferencia di prensa, a remarca riba su peticion pa bin cu un Dialogo Nacional, cu no ta un, ni dos, ni tres pero cantidad di caminda tin den gobierno, ta boluntad e mester tin.
“Nan a bisa mi no uza e palabra ‘cohon’ mas, pero tin cu use pasobra esey ta e palabra pa demostra e curashi cu, como politico, bo mester tin”. El a expresa, y a bisa acerca cu e no ta pensando den e eleccionnan di 2025 y con e ta bay ta para, pero ta pensa si, den e futuro generacionnan cu aki 15-20 aña tin cu biba di e decisionnan cu gobierno ta tuma awe.
Oduber a cuestiona fuertemente cu tin 15 mil hende indocumenta na Aruba cu no ta paga AZV, SVb ni impuesto ni tin un cuenta di banco pa deposita nan placa y participa den e economia di Aruba.
“Pero nos no tin ningun hende ta hortando afo. Nos no tin ningun hende bibando bao di brug, nos no tin ningun hende bibando bao di un palo. Nan ni un ta muriendo di hamber. Di con? Pasobra tur ta trahando. Pero nan ta trahando preto. Nan ta trahando den cas di hende di nos mes Arubiano, of cu otro compatriota, nan tin un tienda na nan cas, nan ta pinta huña na cas, nan ta drecha cabey, nan ta traha den construccion, den restaurant, den hotelnan, na oficina di abogadonan, docternan, tur caminda nan ta traha indocumenta, y no ta pagando AZV, SVb ni belasting y tampoco tin un cuenta na banco pa participa den e economia di Aruba.
Diescinco mil hende cu si nan aporta mañan na tur e fondonan cu mi ta menciona aki, nos por yega na entrada cu nos pensionadonan por haya un alivio. Nos pensionadonan cu ta pagando entre 6.5 cu 9.5% awe na AZV”, Otmar Oduber a reitera concluyendo e tema di BBO na Frontera y aumento drastico di costo di bida.
