Otro siman, Diasabra 30 di Mei:
ORANJESTAD (AAN)-- “E Conferencia cu Stichting Tienda di Educacion ta organizando den cuadro di su 14 aña di existencia, su nomber ta bay ta “Conferencia di Famia di Generacion pa Generacion”, y lo tuma lugar Diasabra 30 di Mei na Renaissance Convention Center, di 8’or di mainta pa 1’or di atardi.
“E dia aki nos kier enfoca riba balansa, pasobra nos ta mira diariamente den guia cu nos ta duna riba e parti curativo, cu balansa ta algo cu, diariamente, ta bira hopi dificil pa e mayor”, señora Miosotis Tromp a duna di conoce, den entrevista cu Matutino DIARIO.
El a agrega cu pa por cubri e dia aki lo tin tres orado. Lo cuminza cu Antoniette Geerman, ken lo enfoca riba un topico hopi importante, unda e ta bay duna espacio pa enfoca riba “ken bo ta”, “ken bo kier bira” pero tambe con pa trece un sentido mas intenso na bo bida, pa duna bo un push pa sigui mas dilanti.
“Hopi biaha nos ta hopi den e rol di mama cu nos ta lubida riba nos mes, como persona. Y tambe e tata, pasobra nos ta ripara cu e tatanan tambe ta bin dilanti cu nan tambe kier haya e guia riba esaki”, señora Tromp a señala.
Otro orado lo ta Johnny Boekhoudt ken ta bay enfoca riba e tema “Importancia di cada rol di mama y tata” y con nan por sostene otro pa tur dos haya e balansa unda e mama por descansa, pero tambe cu nan haya e espacio pa fungi como tal. “Pa termina nos lo tin un mainta hopi practico tambe, nos tin Clementia Eugene, profesor na Universidad di Aruba, ken ta bay enfoca riba con bo por ta mas presente cu bo yiu, con por tuma e tempo, cual ta e puntonan cu mester enfoca cu bo ta presente na e momento ey. E ta bay duna tambe e aspecto practico na e mayornan sea ta Oma, Tanta, Tanchi, pa sinta practica tareanan unda por ta mas presente y tambe con por haci esaki den union familiar, pa trece e miho crianza pa e muchanan den bida diario, y nan ta hiba e tools na cas p’asina nan sigui p ractica”, señora Miosotis Tromp, di Stichting Tienda di Educacion a relata.
