ORANJESTAD (AAN): Un otro aña escolar ta start sali y nos muchanan manera tambe nos hoben nan a haya chens pa relaha y recarga e energia pa cuminsa cu e reto nobo.
Tin algun cu a termina un etapa y lo sigui pa un estudio avansa y otronan a scoge pa drenta area laboral.
Cualkier cu ta e reto nos ta desea tur hoben hopi exito, corda educacion ta e yabi. Na tur mayor, cu tin e tarea mas esencial den bida di nos muchanan tambe ta bay palabra di exito.
Ban prepara y sostene nos yiu pa bay scol back: Drumi na ora, prepara uniform, prepara tas, pone sandwich cla y sali na ora pa evita e trafico druk di mainta, vooral cu hopi mayor kier saca un potret di e yiu prome cu bel bati. Esakinan ta algun di a tantisimo cosnan cu mester tene cuenta cu ne den preparacion pa e prome dia di scol.
P’esey ta importante pa planifica y prepara di antemano hunto cu e yiunan pa asina haci e proceso aki uno mas placentero. Tin algun mucha lo sinti presion otronan lo tin hopi alegria y tin esnan cu no lo mustra nan reaccion, ainda. Pues tin asina tanto factor cu mester tene cuenta cu ne y sin lubida di mayornan cu tin’e poco dificil pa laga nan yiu atras, vooral si ta trata di esnan mas chikito cu pa prome biaha ta bay un scol.
Importante ta pa duna bo yiu(nan) un palabra di sosten y tambe recordanan cu bo ta stimanan masha hopi mes. Kisas como mayor bo tambe ta nervioso y no sa con pa no laga esaki mustra. Ta honesto y comparti bo sentimento cu bo yiu(nan). No ta facil pa waknan crece, asina liher, pa realisa cu tempo no ta warda y ni para keto pa niun hende. Traha tempo pa comparti momentonan agradabel cu bo yiu(nan). Comparti recuerdonan di antes tempo cu bo persona mes a bay scol. Ta leuk pa conta storia real y recorda esakinan.
Palabra con bo yiu lo kier pa abo sostene riba su prome dia(nan). E kier pa e mayor cu ta hib’e baha cu ne of e lo kier baha su so? Porta e ta mas comodo si e mayor ta warda un rato cu n’e sinta den auto. Kiermen ta importante pa check pa haya sa kico bo yiu lo desea. Esaki ta depende tambe cuanto aña bo yiu tin. Dimes esun nan mas chikito lo mester di hopi mas sosten cu esun nan mas grandi.
Tienda di Educacion ta cla pa brinda servicio na tur mayor, educador of profesional den cuadro di lantamento di un mucha. Nos tin confianza cu nos muchanan y hoben nan lo haci nan maximo esfuerso pa logra nan meta den e aña academico nobo. Tienda di Educacion ta recorda pueblo di Aruba cu nan ta na servicio pa conseho of sosten den lantamento di un mucha. Por yama Tienda di Educacion na 161 di dialuna pa diabierna 8:00 am – 6:00 pm. Por comunica cu nan tambe via This email address is being protected from spambots. You need JavaScript enabled to view it..
Stichting Tienda di Educacion a cumpli na mei ultimo 11 aña sosteniendo mayor, educador of cualkier persona cu tin e tarea pa lanta un mucha cu cualkier preocupacion of pregunta. Tur yamada na 161 ta anonimo. Tambe ta brinda servicio di duna tayer tocante diferente topico cu ta encera lantamento di mucha. E organizacion ta forma parti di Comision Vision Pedagogico di Aruba hunto cu otro organizacion nan esencial den e cuadro di lantamento di mucha y hoben. Nan ta situa den edificio di Centro Pa Hoben & Famia, situa na Sabana Blanco 68-C.
