Director di NV Elmar, Anthony Irausquin:
ORANJESTAD (AAN): Durante un rueda di prensa diaranson mainta, gerencia di NV Elmar a elabora riba diferente aspecto relaciona cu e storing cu a presenta recientemente.
Anhony, Irausquin, Director di e compania a indica cu por tin 'storing' pa motibonan di mantencion, pa motibo di incidentenan, pero tambe por tin 'storing' door di accidente. Esaki ta haci cu coriente ta keda cay afo constantemente.
Un di e aspectonan aki pa cual por tin 'storing' ta mantencion. Por ehempel, e pandemia a trece cu ne algun retraso y esaki a keda prevalece cu cierto tipo di material manera trafo (transformators). Tabata tin 'issue' tambe cu palonan di luz y esakinan tampoco tabata tin suficiente.
Ora cu tin varios accidente cu ta pasa rond di Aruba, esaki ta haci cu coriente ta cay afo. Por ehempel, aña pasa tabata tin 170 accidente caminda a dal den pal'i luz, mientras cu Elmar e mantencion ta minimo un pa siman, 52 pa aña, e ora ta papia caba di 170 pa 200 biaha cu coriente a bay na Aruba, a splica.
Segun Irausquin, esaki ta nifica cu Elmar tin e parti di mantencion cu ta un biaha pa siman, pero banda di esey tin e accidentenan. "Consecuentemente, coriente lo keda cay afo".
Pa locual ta e plan di mantencion mes, e compania tin un plan di 5 aña, pero ya tin algun luna caba cu a acelera esaki pa motibo cu tin material awo, a bisa. Door di esaki mantencionnan ta tumando lugar rond di Aruba y aworaki ta den e fase final pa locual ta trata e onderstation nobo na Sabana Blanco, Anthony Irausquin a duna di conoce.
