Thomas Paesch ta conta con casino a kit'e di trabao mientras e tabata malo c'un infeccion den pia

Siete aña wardando pa husticia traha:

ORANJESTAD (AAN ) – Despues cu señor Thomas (Thom) Paesch tabata trahando den un casino, na aña 2015, accidentalmente un angua a drenta su pia y e mester a bay Eerste Hulp, unda el a haya alivio pa su dolor, y nan a saca un parti di e angua, sin ripara cu otro pida a keda aden. E tabata trahando y na dado momento el a bira malo y a pidi su hefe permiso pa bay docter.

            Dos biaha docter mester a habri su plant'i pia, pasobra el a haya infeccion y e area aki tabata birando color biña. Docter a sigui coba den su plant'i pia te cu e otro pida di angua a sali.

            Tom a bay SVb y nan a regla tur cos pe, y ora cu el a keda cla el a bay traha pero a resulta cu e dos manageran a kit'e for di trabao mande cas, sin cu nan tabata tin motibo pa haci esaki.

            Den varios ocasion el a entrega doñonan di trabao tur papel di SVb cu ta mustra cu el a pasa den un situacion cu a strobe pa traha, door di e infeccion den su pia, pero nan no a haci nada cu esey. Tom a busca un abogado cu pa un of otro motibo no tabata constant cu su caso.

            El a bay Corte unda nan a bis'e cu su caso a caduca. El a bisa cu esey no por ta pasobra na su trabao a keda retene tur cos, te un maleta e tin cu tur prueba cu el a traha hopi aña.

            El a bolbe topa cu su abogado pero esaki a bira malo y mester a bay Colombia pa problema di curazon. Tres dia pasa el a wak su abogado ken a tuma e caso bek y a bis'e cu e tin cu bay apela e casonan na Corte di Corsow unda tres Huez lo atende.  Pero te aworaki e tin siete aña pa su caso wordo trata debidamente.

            Mientrastanto, e casino a cambia di abogado, ken a dun'e su 'werkboek' sin nada skirbi den dje, manera e fecha cu el a traha cu e casino ni dia cu nan a retir'e for di trabao.

            E abogado cu e tabata tin  prome a dune e nomber di otro abogado cu tin e caso awo, pero el a haya abogado liber di gobierno via DAS. Awo e ta warda wak ta ken ta bay paga e daño cu a wordo haci, cu a yega riba 200 mil florin di tur su añanan sin trabao.