Theo Ruiz a cumpli 48 aña di notabel di dedicacion den industria di turismo 

Minister Dangui Oduber

ORANJESTAD (AAN): Diaranson mainta Minister di Turismo y Salud Publico Sr. Dangui Oduber a honra sr. Theo Ruiz pa su dedicacion & compromiso durante 48 aña di servicio. 

            Su trayectoria di trabou a cuminsa na 1975 y desde e tempo ey a laga un marca asombroso den e sector di hospitalidad. Ela traha na diferente hotelnan conoci na Aruba manera Holiday Inn, Aruba Caribbean Hotel, Concorde Hotel, Tulip Hotel, Radisson Hotel y finalmente su ultimo aña na Hilton Hotel Aruba.

            Minister Dangui Oduber, ta reconoce e servicio remarcabel di Theo Ruiz y e impacto positivo cu e tabata tin ariba industria di turismo y tur e amistadnan cu e la crea cu nos turistanan durante su añanan di servicio. 

            Sr. Theo Ruiz mes a expresa su sincero amor y pasion pa su trabou cu a pone destaca. No ta trata solamente di brinda un servicio excepcional, si no tambe di crea conexion significativo cu nos bishitantenan.  

            Den reconocemento di e carera remarcable aki, sr. Theo Ruiz su conseho cu e ta ofrece ta, “Bo lo wordo recompensa si bo ta stima bo trabou y duna bo miho servicio”. Su herencia ta un testimonio cu di un boca pa otro, turistanan lo comparti historia di nan experiencia excepcional na Aruba.  

Minister Dangui Oduber den nomber di Gobierno ta gradici sr. Theo Ruiz pa su dedicacion, pasion y lealtad di e servicio cu a brinda na nos localnan y turistanan.