'The Ultimate Next Gen Runway' ta ilumina Aruba cu style y confiansa

ORANJESTAD (AAN): E pasarela lo briya mas cu nunca ora The Chaz Modeling and Talent School ta presenta Glitz, Glam & Glow:

The Ultimate Next Gen Runway, un show di moda espectacular cu ta celebrá e talento nobo, creativo y briyante di Aruba.

Siguiendo e exito grandi di “The Greatest Show” na aña 2023 e edicion di e aña aki ta subi e nivel cu un tema inspiradó: “Glitz, Glam & Glow.” E evento ta combina moda, creatividat, arte y confiansa den un experiencia visual y emocional cu lo keda na memoria di tur hende cu ta asisti.

“Glitz, Glam & Glow no ta solamente tocante moda, e ta tocante empowerment, confiansa i expresá bo mes,” segun Directora di The Chaz Modeling and Talent School. “Tur modelo cu ta subi riba pasarela ta un ehempel di valentia, talento, confiansa, creatividat y orguyo.”

Un Celebracion di E Generacion Nobo

E show ta conta cu un grupo di modelonan hoben cu a pasa pa e programa innovadó di Chaz, cual lo mustra coleccion di diseñadónan talentoso, segmentonan temático y efectonan di lus cu ta reflehá e idea di “glow.” Ta spera un atardi yen di energia, musica y positivismo, un refleho real di e espirito vibrante di nos hobennan di Aruba. Tambe lo tin The Explosion Dancers for di Curacao lo bin presenta varios Bailenan super energetico y moderno p’asina entretene e publico presente. Pa e runwaynan lo tin 3 Designers cu lo presenta nan collecion nan espectacular pa e publico presente. Muchanan, hobennan y mayornan no perde e oportunidad aki y bin cu tur e animo pa disfruta di un bunita show varia pa sera e vakantie aki.

Fecha di Glitz, Glam and Glow ta diadomingo awo 19 october 2025, na Renaissance Convention Center cuminsando for di 5:30 PM. Ticketsnan ta obtenibel na Afl. 50,= (pre-benta) y na porta Afl. 65,= (bishita nos facebook y instagram page pa contact nos). Por DM 5604567 pa bo cumpra bo ticket tempran.

Glitz, Glam & Glow ta atraé famianan, amante di moda y arte di expression, y media local, na unda ta duna un plataforma unico pa mustra e creatividat y confiansa di e generacion nobo di nos isla.