Test genetico a confirma cu Shoco di Aruba ta unico na mundo y ta rekeri proteccionnan specifico

Cynthia Steiner, Associate Director di San Diego Zoo Wildlife Alliance

ORANJESTAD (AAN): Cynthia Steiner, directora asocia di Laboratorio Genetica di Conservacion di San Diego Zoo Wildlife Alliance na San Diego, California, durante un bishita na Tierra del Sol, a splica cu nan ta trahando cu profesionalnan na Aruba pa studia muestranan y material genetico di shoco di Aruba, pa asina determina si shoco di Aruba ta diferente for di e otro shoconan cu ta existi na Norte America, otro islanan di Caribe, y Sur America.

Pa medio di e estudionan genetico aki, nan por determina cu e material genetico di e shoconan aki ta unico y ta rekeri proteccion specifico y unico pa su conservacion. Genetica tambe ta hopi importante pasobra e ta wordo uza como otro muestra den otro testnan basa riba e morfologia y comportacion di e shoco di Aruba, cu tambe ta basta unico, pa por aumenta e nivel di proteccion pa e especie aki na Aruba.

Steiner a enfatisa cu e aspecto genetico di e shoco ta hopi distinto. "Nos tabata hopi interesa pa sa por ehempel con diferente e shoco tabata compara cu di e poblacion di Venezuela pasobra Venezuela ta hopi cerca di Aruba, y nos a constata cu nan ta hopi diferente. Pero tambe e shoco di Aruba ta diferente den otro aspectonan. E vocalisacionnan, e yamado ta diferente, e morfologia, e zonido, tur e zonidonan cu nan ta haci ta diferente. Tambe, su tamaño y color ta notabel. E ta un poblacion cu ta bastante unico."

Steiner a bisa cu loke nan ta purba haci ta, prome, concientisa comunidad cu e especie di shoco ta unico y, na di dos lugar, aumenta proteccion riba e shoco pasobra nan ta hopi specifico y unico pa e area aki.

El a splica cu e siguiente paso ta pa nan publica nan resultadonan y despues presenta nan na e comunidad cientifico, y despues na IUCN (Union Internacional pa Conservacion di Naturalesa), y nan lo presenta un caso pa poblacion di shoco wordo considera como un unidad di conservacion unico y pa su status di conservacion wordo aumenta.

Actualmente, shoco di Aruba ta wordo considera un especie di cu no tin hopi consideracion pa conservacion. Nan meta ta pa hisa e status aki, posiblemente na e nivel di un especie den peliger di extincion.