Terminal di crusero ta completamente certifica

Como parti di Aruba Health & Happiness Code: - *Mas tour operators a ricibi e seyo di oro - ORANJESTAD (AAN):  A.T.A. hunto cu diferente instancia gubernamental a lansa

e programa di Aruba Health and Happiness Code (HH Code) cu e meta pa sigura cu protocolnan di higiena y salud ta na un nivel cu nos bishitantenan ta spera ora di bishita un destinacion turistico manera Aruba.

            Sigur awo cu turismo ta biniendo bek fuerte, pa oficina di turismo ta di sumo importancia cu e instancianan turistico como tambe companianan local por keda provee e miho servicio y producto posibel asina garantisando cu nos ta un destinacion cu ta keda 'safe' pa bishita.

            Den cuadro di e prome bishita di crucero desde 2020, A.T.A. conhuntamente cu Taskforce/ DVG a bishita y certifica tur companianan localisa den e terminal pa asina por bin na remarca pa e seyo maximo, pues e Seyo di Oro di Aruba Health and Happiness Code. Tambe e terminal riba su mes a wordo reconoci pa ta cumpli cu e reglanan vigente y tambe a haya su Seyo di Oro.

            Ademas a sigui cu e control di diferente tour operator, unda recien a organisa un asina yama “drive thru” unda diferente compania a bin pa asina por pasa e control y haya nan Seyo di Oro.

            En total a logra otorga 7 compania cu e Seyo di Oro. E “drive thru’ aki lo ripiti sigur un biaha mas, cu lo ta planea pa dia 17 di juni cuminsando pa 8:30 or di mainta pa 10 or di mainta dilanti oficina di turismo, L.G. Smith Boulevard 8.

            Tur tour operator cu tin vehiculo por trece esaki na e parkinglot pa asina wordo controla. Manera ta conoci caba, den e proceso di HH Code,  ta sigura pa e parti di protocol di higiena como tambe ta sigura cu e vehiculo ta cumpli cu tur rekisito pa por ta riba caminda.

            Un palabra di pabien ta bay na Kini Kini Tours, Allstarz Tours, Excellent Jireh tours, Fofoti Tours, Jeff Tours, Yuyu Tours, Wix Tours, Freddy Ready, HF Tours y Cocolishi Tours. Nan tur a logra y asina a ricibi nan Seyo di Oro. Sigur un bunita logro!

            Companianan cu kier ricibi mas informacion por semper manda un email na This email address is being protected from spambots. You need JavaScript enabled to view it.. Si bo compania ta registra pero no a ricibi un email ainda, fabor verifica bo spam/ of junkbox prome cu comunica na e e-mail menciona akiriba.

            Aruba ta conta cu e motivacion y aportacion di cada un di nos pa haci e cambio positivo pa nos isla!