Na lugar di bay dilanti a keda bay patras
ORANJESTAD (AAN) – Por corda tempo cu e parada di busnan di Arubus tabata hopi incomodo, un poco pariba di e parti patras di Parlamento, unda tur hende mester a para den rij riba acera, sin un lugar pa sinta, y bao influencia di tempo, esta den higra di solo of awacero.
Tempo despues, e ex-director di Arubus Frankie Kuiperi (dfm) a yama un conferencia di prensa pa anuncia un proyecto di gran magnitud, cu tabata e construccion di e terminal di Arubus na Playa, cu a consisti di e oficina di e controladornan y otro cu localidadnan pa huur. E tempo ey, Arubus mes tabata maneha e parti di infrastructura tambe, pero cu poco despues a bay den man priva, y Arubus a keda solamente cu e parti di transporte di pasahero y e carchinan (awendia smartcard).
E tempo cu a construi e terminal Kuiperi tabata tin e usuarionan hopi na pecho. “E pasahero ta central” e tabata bisa. Pasaheronan a haya un espacio amplio cu varios asiento di cement, pinta di diferente color, bao un dak pa proteha nan di e solo pisa of di yobida. Lamentablemente, nada di esey ta existi mas.
Tin construccion ta tumando lugar unda a cera tur espacio unda cu e usuarionan por scapa di solo of di yobida. Por mira e asientonan na aire liber y algun bao di tentnan, cu biento a encarga su mes di kibra e lona y laga e usuarionan na caya. Calor ta dal duro y si tin yobida no tin unda pa sconde.
E cliente no ta central mas, sino negoshi cu esun of esnan encarga cu e infrastructura por haci cu e edificio. Incluso e local unda Arubus ta bende smart card pa turista y ta yena esnan pa pasahero local, ta mahos. Un mal bista. Berdaderamente lamentable, cu un terminal di Arubus cu a costa un inversion hopi cuantioso, y cu a wordo traha cu e meta di beneficia e pueblo usuario, a para bira un luga incomodo, nada agradable ni atractivo pa e pasaheronan tanto turista como local.
