Teo Farro a bira e gran ganador di Caribbean HandyMan Challenge di Kooyman

ORANJESTAD (AAN): Riba un Diasabra hopi prometedor, dos persona local a presenta cu yen animo, enfoque, y dedicacion pa competi den e final di Caribbean HandyMan Challenge di Kooyman Mega Store pa Aruba. 

   E evento a cuminza na luna di Mei caba cu 10 participante, y a selecciona dos persona cu ta bay pa e reto final.

   Dos persona local a competi pa den e tempo stipula crea un cas pa cacho manera ningun otro!  Nan a usa herment y materialnan na Kooyman mes.

   E dos competidornan final tabata Teo Farro y tambe Robert Correa.  Nan a cuminza for di 8:00 am y a sigui te cu 5:00 pm.  Cada uno tabatin nan fanatico cu a apoya nan di comienzo te fin.  Henter dia por a mira clientenan cu  ta pasa y mira nan traha, ta zaag, ta scruf, ta verf, y tabata duna nan animo tambe.

   E ganador grandi a bira Teo Farro.  El a bira e ganador di e Caribbean HandyMan Challenge pa Aruba na Kooyman, y esey nifica cu e ta bay representa Aruba awor pa haya sa kende ta e mihor Handyman di Caribe.

   E dos casnan di cacho a wordo entrega como donacion na Aruba Animal Shelter, como un bunita gesto di Kooyman MegaStore.  Teo mes a ricibi un premio di $1.000.