90 trahador lo wordo priva di nan entrada: - ORANJESTAD (AAN) -- Maestronan y alumnonan di e scolnan catolico, a haya manera un hemchi di awa frio riba nan cabes,
ora nan a scucha cu, cueste loke cueste, e minister di enseñanza demisionario, faltando dos dia so pa eleccion, ta duna ordo pa SKOA retira e werksternan cu nan tin den servicio.
No obstante, cu e maestronan ta pendiente di un reunion extraordinario di SIMAR, nan a kere cu e situacion di e werksternan lo a haya un solucion, y mas cu Prome Minister mes a bisa cu e lo interveni pa yega na otro solucion.
Awor nan ta bin realiza cu nada di esaki a sosode, y awo 90 trahador di limpieza di scolnan, ta cu un pia afo di e mercado laboral, siendo cu pa hopi aña e trabao aki ta pone pan riba nan mesa, y aunke bibando humildemente, nan tin un entrada pa cria nan famia.
Con ta posible cu net aworaki, cu ainda Aruba no a sali di e crisis economico y cu costo di bida ta excesivamente caro, 90 trahador humilde, e werksternan, un minister sin curazon ta laga nan sin trabao. Segun opinion cu a drenta Mesa di Redaccion merdia, esaki ta e peor minister cu e mundo di enseñanza na Aruba, a yega di conoce. Hende cu ta traha y ta biba di e veld di enseñanza dia pa dia, y cu mester bringa contra tur contratempo cu a wordo crea pa un persona, cu ta parce no tin ken pa pare, ta sinti cu nan mester tuma e actitud di e minister como un sorto di venganza, pasobra hopi el a wordo hopi debati pa su decisionnan sin pia ni cabes, y el a bay atrobe riba e werksternan, manera cu nan ta e grupo mas vulnerable den e veld.
E trabao di e werksternan ta sumamente necesario, y e funcionamento di scolnan lo wordo afecta severamente, segun opinion di un docente, cu a tuma contacto cu Mesa di Redaccion, y cu ta spera cu tanto e parlamentarionan como e otro ministernan, maske nan ta demisionario, por para e decision aki di e minister.
