ORANJESTAD (AAN): Aparentemente e Scammernan internacional ta buscando nan suerte di gara potencial victima na Aruba tambe!
Esey ta algo cu a bin ta notando ultimo simannan riba Social Media.
Djis corda cu hamas bo mester duna otro hende, cualkier “code” di sea WhatsApp, of di Facebook, of di Instagram, cu ta wordo manda pa bo celular. Hasta si ta un ‘amigo’ di bo ta bisabo pa bo yude recupera su account door di manda bise ki “code” lo drenta via SMS na bo telefon! Nunca duna un hende un “code” cu drenta via bo SMS di celular. Hamas!
Pero awor tin otro Scam ta pasando rond cu algun ciudadano ta ricibi via nan telefon celular. Esaki ta forma parti di e ‘Package Delivery Scam’. Un triki cu nan ta usando pa bo kere cu Servicio Postal no a logra entrega un pakete na bo cas of negoshi, y aki ta spera cu lo bo reacciona bek na e SMS aki pidiendo yudansa... y e ora nan ta bin ta exigi pago prome cu bo haya e pakete.
Tur esey... siendo cu Servicio Postal en realidad no tin nada di pakete! Lo peor ta cu no ta Servicio Postal ta manda e mensahenan aki tampoco.
Si bo haya SMS similar na loke bo ta mira riba e imagen aki, por fabor sea alerto y djis blokea e number y elimina e mensahe. Pasobra si bo reacciona... nan lo busca tur sorto di forma pa saca placa di bo. Esaki ta pasando desde siman pasa caba na Aruba, pues lectornan ta ser pidi pa tene cuenta cu esaki.
