Tene bon cuenta of paga tino ora cu bo yiu ta tira klapchi

Comandante di Brandweer Francis Toussaint ta pidi mayornan:

ORANJESTAD (AAN)-- Señor Francis Toussaint, Comandante di Brandweer, den entrevista cu Matutino DIARIO, a elabora tocante tiramento di klapchi y e precaucionnan cu mester tene cuenta cu ne. E ta dirigi e siguiente palabranan pa mayornan:

   “Mayornan, tene bon cuenta of paga tino, ora cu bo yiu ta bay tira klapchi. Semper ta presente of percura pa tin hende grandi ora cu bo yiu ta bay tira klapchi. Es mas, cumpra klapchi pa e edad di bo mucha. No pasobra bo bisiña ta tira ‘flower bed’ of cosnan pisa abo tambe kier bay tira. Corda bon, cu bo tin yiu chikito. Ta vacantie tambe. Bay cu e klapchinan na trabao, pasobra si e muchanan ta bay inventa cu klapchi, por tin incidentenan cu  nos no kier”, Toussaint a alerta.

   El a agrega cu pa hopi aña e incidentenan aki ta bahando danki na e hecho cu Brandweer ta concientiza e muchanan na scol y nan ta capta esaki.

   Comandante Toussaint ta corda un aña cu el a bay duna charla na scol y un mucha a yega un tiki laat scol. Anto e juffrouw a haci señal cu’ne. Ora el a caba e lectura el a puntra Juffrouw pakico el a yame. “El a bisa mi cu e mucha ey a caba di sali di docter, y e pregunta cu el a  haci na docter ta ‘ki dia ‘e dos dedenan lo crece bek’. E mucha aki a haya accidente cu klapchi. Ora nos a scucha esaki a touch nos, un lastima sigur cu si!” señor Toussaint a trece dilanti.