ORANJESTAD (AAN): E temporada oficial di horcannan di Atlantico 2021 a finalisa diamars 30 di November siman pasa. Esaki tabata e di seis temporada consecutivo riba e promedio.
Segun un estudio di e Instituto di Tecnologia di Massachusetts publica diahuebs ultimo ta trece dilanti cu ta existi un tendencia a largo plaso na un number creciente di horcannan na Oceano Atlantico.
Por ehempel, e desasternan climatico causa pa e horcannan ta esunnan mas costoso pa paisnan manera Merca, unda ta calcula cu e costo total di e dañonan causa durante e temporada 2021 ta supera 70 mil miyon dollar.
Investigacionnan anterior lo a sugeri un posibel aumento den e intensidad di e horcannan na lama Atlantico den e ultimo decanan, vincula na e cambio climatico causa pa e humanonan.
E estudio aki no solamente ta respalda esaki, mustrando cu e tormentanan ta birando mas destructivo, sino cu tambe ta haya cu e horcannan como e horcannan mayor ta aumentando den frecuencia.
E investigacion aki a wordo publica den Nature Communications, dirigi pa e cientifico atmosferico Kerry Emanuel, a uza un enfoke novedoso pa evalua e actividad di tormentanan pasa.
Na lugar du confia den observacionnan historico, cu por tin gapnan, a realisa modelonan climatico pa reconstrui un registro continuo di e actividad di e horcannan durante e ultimo 50 añanan a partir di cual por midi e tendencianan.
Su enfoke ta evita un di e obstaculonan mas grandi den e investigacion di horcannan a largo plaso, cual ta e observacion di tormentanan incompleto y inconsistente disponibel prome cu e satelitenan meteorologico por tabata presente di manera confiabel for di 1970.
Antes e contabilidad aki tabata un tiki iregular, specialmente den e decada di 1940, ora cu e informacion for di e barconan riba lama grandi tabata un fuente primario.
Ta asina cu e investigacion convencional riba horcannan pasa a wordo extrae for di un base di datonan universal conoci como 'Internacional Best Track Archive', cu ta di 1851. E datonan ta indica un aumento den e actividad di e horcannan desde siglo XIX, pero hopi cientifico atmosferico ta mustra esceptico cu e aumento ta real. Nan ta atribui e aumento na e mehora den e tecnicanan moderno di vigilancia. Den otro palabra, nan ta sinti cu algun di e tormentanan cu e satelitenan por wak awor tabata imposibe di detecta den pasado y a publica investigacionnan cu ta demostra esaki.
Sinembargo, e resultadonan di e estudio di Emanuel ta sugeri cu ainda tin un aumento den e frecuencia di e horcanan di lama Atlantico.
E datonan climatico, como e temperaturanan di e superficie di lama y e observacionnan terestre, ta hopi mas disponibel cu e prome informenan di horcanan.
Emanuel a duna di conoce cu su hayazgonan a coincidi cu e observacionnan di un 'sequia di horcannan' durante e decanan di 1970 y 1980. E ta kere cu e culpabel tabata un nubia di aerosolnan di sulfato proveniente di combustibelnan fosil, cu por a provoca un proceso di reaccion den cadena cu a fria lama Atlantico noord y a reduci e actividad di e tormentanan. E horcannan ta depende di awa cayente pa por desaroya.
E secura aki a termina algun tempo despues di e inplementa e regulacionnan di aire limpi, locual a frena e emisionnan di e particulanan aki di friamento. Despues, e temperatura di lama a cuminsa aumenta di nobo, mescos cu e actividad di e horcannan.
Emanuel tabata tin cuidao di aclara cu aunke su resultadonan ta mustra un aumento notabel den e frecuencia di e tormentanan, cu e razonnan no ta mucho cla ainda. Esaki ta sigui un misterio, y tin di haber cu e cuestion riba con e calentamento global lo por afecta e horcanan futuro den Atlantico, a bisa.
Segun Emanuel, e calentamento global ta algo no necesariamente uniforme na nivel mundial.
E temporada di horcannan 2021 a finalisa cu 21 tormenta cu nomber di cual 7 a bira horcan y di esakinan 4 tabata horcannan mayor, leu di e recordnan di 2020 pero hopi mas ariba cu e promedio di e ultimo 30 añanan.
Segun medionan specialisa, 2021 ta e di tres aña cu mas tormenta cu nomber for di 1851 y e di cuater cu dañonan mayor (70.543 miyon dollar). E cifranan mortal ta 161.
Di e horcanan di 2021, 3 a alcansa categoria 1 den escala Saffir-Simpson (1-5), dos a yega na categoria 3 y dos na categoria 4.
Di e ciclonnan di e anja aki, 9 a toca tera na Merca, unda a produci inundacionnan severo, y otronan a impacta Cuba, Mexico, Republica Dominicana y Haiti.
