Crecemento economico a nifica crecemento di demanda pa coriente
*E alarma cu coriente a bati na Europa mester habri wowo di Aruba
*Crecemento mundial di blackout ta aumenta pakete di seguro
ORANJESTAD (AAN) — E caos cu a wordo produci algun dia pasa na e peninsula Iberia na Europa, a bira un alarma mundial , cu manera DIARIO for di un principio a anuncia, mester bira un tema cu Aruba ta atende na tur nivel.
Diariamente cantidad di pasahero mundialmente ta wordo confronta cu tardanza serio den nan schedule di biahe pero e no ta haya e atencion cu e merece pasobra e no ta parti di un situacion mas serio.
Den e ultimo caso un peninsula, na e punto strategico di comunicacion aereo mundial manera DIARIO a aclarea, a wordo confronta cu un black-out, loke a paraliza tur normalidad na e paisnan y tambe a haci cu no tabata tin transportacion publico local ni internacional.
Ta den e cuadro aki , pues e posibilidad cu un apagon ta conduci na un desaster turistico, e suceso a haya tur atencion.
Informacionnan ta afirma cu na diferente parti di mundo, turismo ultimamente ta topa cu e problema aki, loke ta wordo confirma pa blackoutnan na La Palma, parti di e islanan Canaria den vecindario directo di Europa pero tambe na na diferente ocasion na parti West di Merca entre otro.
E problema serio cu a presenta siman pasa, awor mester habri wowo di un pais cu ta ricibi turista y cu mester prepara pa atende cu e situacion.
Cu a trata na principio pa pone tur culpa riba calentamento di atmosfera, mester mustra cu temperatura halto ta aumenta e exigencia pa mas produccion di coriente cu exigencia cu esaki ta encera pa ekiponan di produccion.
Mas calor ta exigi mas uzo di sistemanan manera fan y airconditioning. Na un pais friu por cera porta pero calor ta exigi sistemanan special mas ainda si tene na consideracion construccion actual cu no ta tene cuenta cu realidad di clima.
Pues paisnan mester atende cu aumento di necesidad pa revisa nan produccion di coriente en frente exigencia di uso total, pero na mes momento continuamente mester tin bista ariba e instalacionnan cu mester produci mas debi na e demanda cu continuamente ta crece pa coriente y e forma asina e instalacionnan pa produccion di coriente, ta wordo afecta.
Informantenan di DIARIO ta indica, cu mester tene na consideracion gastonan di mantencion ta subi mescos cu necesidad pa reemplasa partinan di planta, cu ta gasta.
Ta e gastonan aki hustamente ta loke hopi bez ta wordo neglisha of geschrap pasobra nan ta nifica gasto.
Pero ekipo cu no ta den bon condicion pa atende cu e demanda di coriente of di otro banda no ta coresponde na e capacidad mas abou, ta crea problema.
Cambio di clima ta hunga papel den e aumento di necesidad di coriente por ehempel pa airconditioning na paisnan calor pero tambe e efecto cu solo y calor tin riba instalacionnan.
E pregunta ta keda, con viaheronan mester proteha nan mes contgra riesgonan nobo y situacionnan manera a pasa na Spaña principalmente, na Francia, na Portugal.
Informacionnan ta indica cu en berdad e problemanan di pasaheronan cu ta wordo perhudica dor di e sucesonan aki, ta hopi serio, mas ainda pasobra ainda mester yega na palabracionan concreto internacional riba e situacionnan cu ta surgi.
Pa e pasahero ta keda importante pa e por cubri su gastonan y den esaki pues aseguro ta hunga e papel central.
Sinembargo, tur persona cu ta dicidi pa un biahe mester check bon pa kico nan ta cubri y sigur tuma nota e letternan chikito di clausula.
Mester mira bon kico e aseguro ta bisa cu e ta paga, pa cuanto dia, na cual forma, manera informantenan ta trece dilanti.
Na mes momento e lugarnan caminda turistanan ta hospeda, den tur sector mester tene e problema na consideracion y tambe mester percura pa seguro evita problemanan serio cu por surgi.
Sigur den e temporada di horcan, tin motibo pa lugarnan cu ta acepta turista keda, check si nan por cubri e gastonan si e turista ta den problema y si ta necesario busca asistencia di un compania di aseguro cu por yuda cu gastonan cu permanencia mas largo di un turista na forma inespera, por trece.
Informantenan a indica, cu aseguro den e asunto aki ta hunga un papel importante pa e viahero, pa e lugar caminda e turista ta keda, cu ta inclui facilidad na viviendanan di Arubianonan.
Manera a bini dilanti awor, autoridad di turismo na e pais cu finalmente ta Gobierno, mester introduci un sistema di control pa asegura cu tanto na e facilidad mas costoso como e facilidad mas barata, e turista no ta keda ariba caya y si companianan grandi of chikito cu ta aloha turista no ta atende cu e asunto aki, Gobierno crea un plan special pa asistencia di turistanan.
Anualmente ora temporada di horcan ta acerca, DIARIO ta bati alarma pa e bienestar di turistananta garantiza durante nan vacacion, ora nan no por haci uzo di e seguridad cu nan tin na cas.
Awor sigur, cu experencia di otro paisnan cu problema cu coriente, debi sigur den hopi caso na falta di mantencion apropia di e rednan pero tambe na casnan y companianan, tur instancia y miembro di comunidad tin, tin un responsabilidad special, cu cual DIARIO sigur lo sigui cumpli.
