Temporada di Horcan 2025 lo wordo influencia door di La Niña

Rodney Tromp di DMA

ORANJESTAD (AAN): Manera ta conoci, desde Diadomingo 1 di Juni 2025 te cu 30 November 2025, ta temporada oficialmente di Horcan pa 2025.  Expertonan a bin ta pronostica, cu lo bay tin 30% chens cu e temporada aki lo bay ta casi normal.  Tambe tin 60% chens cu e lo bay ta un temporada hopi mas cu normal.  Y solamente 10% chens cu e lo ta un temporada hopi bao cu normal.

   Den un entrevista cu Rodney Tromp di Departamento Meteorologico Aruba (DMA), el a indica cu enberdad Colorado State University y tambe National Hurricane Center na Miami, ta pronostica cu e aña aki e cantidad di tormenta lo ta djis un poco mas cu normal, mirando e hecho cu aworaki nos tin e efecto di La Niña, pero su efecto lo wordo sinti te despues di September.

   Tromp a splica cu expertonan ta kere cu pa zomer (cu ta entrante Juli te cu September), e temporada lo cambia pa uno ‘neutral’, pero despues di esey lo bay sinti efectonan cu ta wordo provoca door di presencia di La Niña.

   Aworaki si bo controla e temperatura di lama tanto den Caribe, y Oceano Atlantico parti central y parti oriental, bo ta nota cu tur di nan ta ariba y poco mas halto cu normal.  Pero toch e ta mas abao cu 2024.  E factornan aki ta duna cu e lo bay ta un temporada di Horcan cu kizas mas tormenta.

   Pa Aruba esey nifica cu lo bay tin mas chens pa mira con Ciclonnan Tropical lo sigui forma.  National Hurricane Center ta pronostica cu entre 13 pa 19 tormenta lo bay haya nomber.  Di nan, como 6 te cu 10 tormenta lo por bay bira Horcan, incluyendo 3 pa 5 Horcan cu lo bira potente.