ORANJESTAD (AAN): Un temblor basta fuerte a keda registra Diaranson atardi, esta 8 di October faltando net 2 seconde pa 2:28 pm a bati.
E ta relativamente basta cerca di Aruba, na parti zuidwest y tabata riba lama.
Oficialmente, e temblor a socede pa 2:27 pm y 58 seconde. E epicentro a wordo localiza na 11.91º Nort, y 70.63º West. Esaki ta exactamente 93 km Zuidwest di e Toren di Aruba Ports Authority den Waf di Playa. E ta igual cu 99 km West-Zuidwest di Baby Beach (San Nicolas, Aruba). E ta igual cu 100 km Zuid-Zuidwest di Faro di California (Aruba). E ta igual cu 54 km Noordwest di Punto Fijo (estado Falcon, Venezuela).
El a registra un magnitud di 4.7º riba Scala di Richter, y e hecho cu apenas e tabata 18.4 km bao superficie di fondo di lama, esey nifica cu e tabatin un impacto fuerte.
Na Aruba no a drenta ningun informacion di hende cu a sinti e temblor, ni tampoco daño material. Riba e grafico por mira e lugar unda e epicentro tabata, y tambe por mira e seismogram di e temblor.
