Patrick Werleman, Director Desaroyo COA:
ORANJESTAD (AAN)-- Patrick Werleman, Director di Desaroyo di Comite Olimpico Arubano (COA), den conferencia di prensa dedica na e Conferencia Anti-Doping cu COA ta organizando, pa tuma lugar di 6 di September proximo, Ballroom di Hotel Holiday Inn Aruba, a elabora tocante meta y temanan di e Conferencia Anti-Doping aki, titula “Fair Play, Clean Future-Protecting the Spirit of Sport”.
Señor Werleman a duna di conoce cu e conferencia aki ta bay dirigi directamente na e atletanan y nan personal di apoyo. “Nos sa cu hopi cos ta pasando, tin hopi tentacion den nos mundo di deporte, pero nos kier duna informacion na nos atletanan y p’esey nos ta organiza e evento aki, unda nos kier invita tur e atletanan di Aruba, y nan personal di apoyo pa nan bin join nos y educa nan mes”, señor Werleman a trece dilanti.
Werleman a expresa cu esaki ta sumamente importante, pasobra mescos cu nan tin debernan nan tin derechonan tambe, y un di nan derechonan ta pa nan wordo concientiza y educa riba nan responsabilidadnan un bez cu nan ta un atleta.
“E tema central di e conferencia ta “Fair Play, Clean Future-Protecting the Spirit of Sport”.
Werleman a defini esaki como un tema hopi specifico dentro di cual ta bay ofrece cuater topico importante na e atletanan, cualnan ta:
- E therapeutic use exemption (ora bo ta uza medicamento tin un manera cu bo por sigui uza nan, apesar cu kizas nan ta prohibi).
- Suplemento y su riesgonan
- Anti-Doping Rules Violations (Violacion di e reglanan anti-doping cu bo por comete)
- E lista prohibi.
“Ora mi bisa ‘papia’ no ta solamente bisa, papia, pero tambe nos ta bay ofrece un formato hopi inter-activo. Pues, e participantenan no ta bay haya presentacionnan cu nan ta sinta wak y scucha. No! E formato e biaha aki ta bay cu nan ta bay ta activo, nan ta wordo educa na un forma di wega y actividadnan den cual nan ta bay participa activamente.{gallery}Tema central di e Conferencia Anti-Doping ta titula Fair Play, Clean Future-Protecting the Spirit of Sport{/gallery}
