Danilo Werleman, Presidente di ATIA:
- Nan ta atende esaki claramente cu Gobierno
ORANJESTAD (AAN) Den entrevista cu señor Danilo Werleman, presidente di Asociacion di Comercio y Industria (ATIA), el a elabora tocante e tema di aumento di prijs, cu ta causando un peso grandi pa nos pais, tanto pa comercio como pa e consumidor, y cu ta un problema global dificil pa resolve.
Werleman a cuminza expresando cu e ta kere cu semper, un gobierno tin cu haci control di prijs den supermercadonan, “pero si nos bay bek na prijsnan nos ta mira cu Aruba a bira hopi mas caro, nos como comerciante ta wak’e y mi ta kere cu no unicamente ta controla e prijsnan, pero pa basta tempo nos ta wak cu prijsnan ta sigui subi”, el a comenta, agregando cu “Nos a bin cu BBO na frontera, nos tin BBO ainda cu tabata temporalmente, pero a bira ya caba cinco aña. E pregunta, claramente ta, con esaki ta bay wordo resolvi. Pasobra lamentablemente Aruba ta birando caro pa nos como Arubiano, y esey ta hopi dificil”, Werleman a señala.
E presidente di ATIA ta di acuerdo cu mester controla pa no tin abuso na prijs, esaki sigur. Pero mester zorg pa nos tin un miho bida na Aruba.
“Y miho haci algo tocante con nos ta baha nos prijs na Aruba. Y no ta solamente e comerciante, pa e comerciante si wak rond mundo tur parti prijsnan ta subiendo pasobra tin diferente cambionan den mundo cu prijsnan ta pone prijsnan subi. Actualmente na Aruba nos ta yegando na un punto cu ta basta dificil pa nos”, Werleman a acentua.
E ta kere cu mester regula e tarifanan di impuesto manera poco aña pasa tabata den discusion. Aumento di prijsnan ta un keho cu constantemente ta yega na ATIA y nan ta atende claramente cu gobierno y e ta sigur cu lo yega na algo rapidamente.
