Kimberly De Cuba ta splica:
ORANJESTAD (AAN): Recientemente, DIARIO a bin cu un publicacion caminda a elabora riba e problematica cu ta escalando caminda por constata cu mas y mas hoben, menor di edad, ta ofrece involucra den casonan di trafico sexual.
Kimberly de Cuba di Telefon pa Hubentud a duna di conoce cu nan ta na altura tocante di esaki. El a reitera tambe cu esaki no ta algo nobo. Ta conoci pa algun aña caba. E diferencia ta cu awendia 'social media' ta asina popular cu e ta haci e asunto aki mas facil compara cu antes.
El a bisa cu locual nan ta wak ta cu tur cos ta bay bek na norma y balor y si esaki no ta fuerte na un cas, hopi cos por sosode. Durante pubertad, por ehempel, e hobennan tin cosnan cu nan kier experimenta y cu tin biaha ta cay den e presion di grupo y ta 'join' esaki.
De Cuba a laga sa cu nan 'samenwerking' semper ta bon cu tur organisacion riba veld social y di husticia. Tin bon colaboracion cu hopi organisacion y ora cu ta topa durante algun training ta papia tocante e temanan aki.
Educacion sexual no solamente mester bay na con por proteha contra e malesanan of pa no sali na estado, pero tambe e amor propio ta hunga un rol pa no bay ofrece e curpa pa cosnan material of pa placa, a expresa.
Segun Kimberly de Cuba, Telefon pa Hubentud ta haya yamadanan di hobennan directamente, pero tambe di amistadnan, familiarnan of personanan cercano na e hoben cu ta preocupa.
E servicio di TPH ta pa mucha y hoben entre 8 y 24 aña, pero nan ta haya un mayor, un wela, un familiar adulto y nunca ta cera e telefon pa nan. Pero e doelgroep ta hoben, unda nan ta haya ayudo pa locual nan tin mester.
