ORANJESTAD (AAN): Bo tin un of varios storia skirbi caba; bo tin un pen cu experiencia, pero toch bo ta sinti cu falta algo ...
un dimension desconici cu bo no por pone bo dede ainda riba dje. E steak ta cla, pero e saus falta net e toke extra. Ora bo laga bo amigonan lesa bo creacionnan bo ta haya “leuk” como reaccion caminda eigenlijk abo kier a tende un “waw”.
Si e situacion aki ta zona familiar, anto muy probabel a yega ora pa hiba bo storia y bo habilidad como escritor pa e siguiente nivel, e tan conocido y alabes dificil pa logra the next level. Desde 23 di october awo, escritor local Vi Frank lo cuminsa duna un curso – organisa dor di Biblioteca Nacional Aruba – con pa dal un stap dilanti den e topico sumamente interesante aki.
Manera e dicho ta bisa: Diablo ta den e detayenan, y Vi kier lanta pa bo e conocido tip van de sluier tocante e tema aki. E meta di e curso aki, ta pa na final e participante amplia su ‘toolbox’ cu mas herment con pa logra nan meta, esta hiba nan tecnica di conta storia n’un nivel mas halto y logra pone nan lectornan pasa oranan excitante.
Den e curso aki lo sali di punto di bista cu e participante ya tin experiencia den skirbimento, y tambe tin un tiki conocemento cu varios topico crucial con pa hinca un bon storia den otro. N’e prome les dje curso, pa pone tur hende riba e mes un pagina, lo duna un resumen cortico dje prome curso, esta esun pa principiante.
Djey, e rollercoaster ta cuminsa coy velocidad. Topiconan entre otro cu lo bay wordo discuti in depth ta: crea personahenan interesante basa riba e teoria di arketipo psicologico, dialogo dinamico cu ta pusha e storia padilanti, structura di storia y plot, conflicto, descripcion y scenario, e arte di mustra y no conta, stilistica, y muy importante, e tan famoso y alabes maldiciona prome frase y paragraf di un storia.
Aunke e ta keda algo importante, den e curso aki no lo pone atencion na gramatica, ortografia, etcetera. Participantenan por skirbi con cu nan kier, den nan idioma preferi, sea ta Papiamento, Ingles, Hulandes, o Spaño, over di cualkier tema of genero di nan preferencia.
