Shurman Milliard, director:
ORANJESTAD (AAN) – Shurman Milliard, director di Telefon pa Hubentud (131),den entrevista cu DIARIO a comenta cu nan por a wak ora nan ta den scolnan, papiando cu e hobennan tocante diferente tema, por ta riba norma y balornan, of e ambiente cu nan tin na cas, toch nan ta bisa cu den temporada di vacacion, nan ta keda na cas, of den famia, podise nan wela, unda nan ta papia tocante norma y comportacion, y nan ta haya esey hopi importante.
Shurman Milliard a señala cu el a wak durante y despues di Covid cu hopi famia ta bin mas cerca di otro, y podise pesey diferente peticion na summer camps o centronan di bario pa vacacion no ta asina grandi.
Den e central di 131, FTPH ta wak cu e yamadanan ta keda drenta y hopi pregunta ta wordo haci door di e hobennan mes, por ehemplo, kico tur tin pa haci durante e temporada di vacacion, y un cu nan ta tende hopi di dje ta actividadnan di “buki di pret” y banda di esey tambe tin summer camp unda TPH ta participa pa duna charla of informacion, y tambe tin momento di educacion den e campamento, pero tambe momento pa disfruta.
Shurman a menciona cu FTPH ta hopi contento pasobra tur ora nan ta haya oportunidad di papia cu e mayornan. “Nos ta un aliado di e mayornan, y nos ta informa nan den anochinan informativo, na scolnan, den centronan di bario na momento cu e adultonan ta bin hunto. No lubida, nos ta bezig tambe cu Bonaire, SABA, St. Eustatius, y ayanan tambe nos ta wak hopi peticion y enberdad den un comunidad chikito, e confianza ta hopi importante”, Milliard a comenta.
El a agrega cu na momento cu algo kibra e confianza, atravez di un yudanza anonimo manera TPH y su profesionalnan, e confianza ta subi y pesey e fundacion ta haya hopi peticion di instancianan internacional manera UNICEF, OKIO, HIAS, Pan American, entre otro stichtingnan, cu kier yega na mas hende, specialmente den plannan comunitario, y tambe na momento cu confianza a wordo kibra di un of otro manera.
