ORANJESTAD (AAN): Aruba Hotel & Tourism Association (AHATA) ta haci un donacion na Fundacion Telefon Pa Hubentud Aruba,
reafirmando asina su compromiso pa sostene e bienestar di nos muchanan y hobennan.
E cheque di 7.500 Florin a wordo entrega pa Vanessa Rasmussen di AHATA na James Sneek di Fundacion Telefon pa Hubentud. Cu e contribucion aki, e asociacion di e industria di turismo ta reconoce e rol vital cu Telefon Pa Hubentud ta hunga den solucionnan pa Aruba su retonan social.
Fundacion Telefon Pa Hubentud Aruba, cu a lansa su liña di ayudo ‘131’ na 1999, ta ofrece sosten y guia anonimo na mucha y hoben di 8 pa 24 aña, 365 dia pa aña. Nan servicionan ta accesibel via telefon, e-mail, y ‘chat’ riba nan app mobil.
AHATA ta reconoce cu e bienestar di nos hubentud ta directamente conecta na calidad di bida general y na e futuro di Aruba su economia. E donacion aki ta un expresion di AHATA su dedicacion na e crecemento positivo di nos comunidad y sosten di servicionan esencial.
E donacion di AHATA lo yuda Telefon Pa Hubentud continua nan operacionnan vital, cual ta depende fuertemente di donacionnan pa por ehecuta su proyectonan y programanan cu ta sirbi nos hubentud.
