Wageningen Marine Research
ORANJESTAD (AAN): E articulo interesante aki ta indica cu na October di aña pasa un crocodril Mericano (Crocodylus acutus) a yega Boneiro, cu despues autoridadnan a captura sin motibo serio. E accion aki a resulta den morto di e bestia, un especie internacionalmente proteha y cu ta den e lista di sortonan legalmente proteha, tambe na Boneiro.
Expertonan ta pidi pa den futuro atende di otro forma cu casonan di crocodril na e islanan, awor cu investigacionnan mas recien di Wageningen Marine Research, ta mustra cu e islanan aki ta simplemente parti di e area natural di e especie menasa aki.
E articulo concerniente a keda publica fin di luna pasa den e revista cientifico Caribbean Journal of Science na man di cientifico Dr. Dolfi Debrot y su coleganan di e asina yama Crocodile Specialist Group di Union Internacional pa Conservacion di Naturalesa
A bin topa cu e crocodril na e playa popular di Sorobon na Lac na Boneiro, october di aña pasa. Mandatarionan insular di Boneiro a duna orden pa cera e playa pa publico, y un buskeda intensivo a cuminsa pa captura e bestia cu inicialmente a reporta como 4-5 meter grandi, no obstante cu tabatin peticionnan di profesionalnan pa laga e bestia na paz.
Un par dia despues a habri playa di Sorobon pa publico atrobe, notando cu e bestia tabata masha skiuw, cu (riba portret) por a mira cu e tabata demasiado chikito pa por mustra comportacion peligroso, y cu su cuminda normal ta presanan chikito manera pisca, cangreu y parha.
No obstante, e buskeda a sigui te ora cu a captur’e dia 26 di october. Despues di e captura, a bin sali cu tabata trata un Crocodylus acutus macho hoben, di 2.3 meter di largura. E sorto aki ta conoci na Venezuela principalmente como Caimán de la Costa of Caimán aguja. E bestia esencialmente acuatico a wordu mara na un manera inapropia y despues a pon’e den un container calor y seco, caminda e no por a regula su temperatura. Dia 29 di october e bestia a fayece.
E sucesonan tristo cu a resulta den morto di e crocodril lo por a wordo evita facilmente si e autoridadnan lo a tene cuenta cu e leynan vigente, a busca (y sigui) conseho di expertonan, y si lo a sigui instruccionnan corecto pa atende cu crocodril.
Aunke ta obvio cu pa periodonan largo den pasado historico nos islanan no tabatin un populacion di crocodril estableci, resultadonan ta demostra cu e especie ta facilmente capaz di yega nos islanan. Tur tres isla tin lagunanan rondona cu palonan di mangel, cu pos di pia y fuentenan natural di awa dushi y brak, ta keda cerca di Continente Sur Americano, y tin un posicion favorabel pa cu coriente di lama cu ta bini for di costa di continente.
Debi na e echo cu e ultimo añanan ta nota regularmente cu e crocodril ta biaha distancia largo (di mas di 300 km) riba laman hancho, por conclui cu ta sigur cu den epoca precolonial, tempo tempo crocodril (cu por biba te 80 aña of mas di edad y pone hopi webo) lo mester a alcansa nos islanan. E articulo ta duna nota di no menos di tres registro adicional pa nos islanan (tur pa Corsou) den siglo pasa.
Probablemente e populacion di crocodril na nos islanan aki lo mester tabata chikito for di inicio, debi na e hecho cu e reptil aki tabata un fuente di cuminda conoci y facil pa e habitantenan Indjan original di nos islanan. P’esey, aunke e islanan ta ofrece habitat esencialmente bon pa e especie, ta probabel cu e crocodrilnan lo a keda casi elimina prome cu colonisacion Europeo a cuminsa.
Aunke e especie ta duna señalan di recuperacion den algun parti di Caribe, den mayoria di e areanan ketobay e ta considera como menasa, hasta den paisnan cu proteccion legal y programanan di cria (por ehempel: Colombia, Costa Rica, Cuba, Mexico y Venezuela).
E islanan pazuid di Caribe cu e mayor posibilidad pa registronan nobo di crocodril ta Trinidad y Margarita, como cu nan ta pega cu costa di continente. Despues ta bini Boneiro, Corsou y Aruba, cu ketobay ta ofrece areanan hopi apropia pa e sorto aki (Spaanse Lagoen, Aruba, Lacbaai, Boneiru, St. Jorisbaai, Fuikbaai, Sta. Martha, Corsou). P’esey, ta haci yamada na cientificonan, ambientalistanan y gerencia di naturalesa di e islanan pa keda alerto pa mas registro di crocodril den futuro.
Den cierto sentido, e caso di e crocodril di Boneiro ta compara cu e di e lobo (wolf) na Hulanda Europeo: un depredador proteha cu no tabata presente pa hopi tempo, y cu (contrario na su paisnan bisiña) sociedad actualmente no sa con trata cu ne.
Como conclusion, e autornan ta spera cu e crocodril di Boneiro no a muri en vano y cu e lo sirbi como ehempel di con no atende cu un crocodril den futuro. Nan ta enfatisa cu tin necesidad urgente pa educacion publico y campañanan di conscientisacion pa desaroya e boluntad y conocemento necesario pa por comparti nos islanan cu crocodril y pa por biba hunto cu nan di un manera constructivo.
Riba potret: Mapa di areanan di presencia actual (berde) y presencia historico (oraño) den Caribe mustrando cu circulonan berde e registronan remarcabel cu ta discuti den e articulo.
Dr. Adolphe O. Debrot, senior scientist
Wageningen Marine Research, Den Helder, Hulanda
{gallery}Crocodril Mericano ta un especie indigeno di e islanan di Aruba, Boneiro y Corsou{/gallery}
