Team Forensico pa investiga accident fatal a yega Aruba

E investigacion di accident ainda no a termina

ORANJESTAD (AAN): Tabata Diadomingo 13 di September cu a pasa, un accidente grave di trafico a tuma lugar na costa pariba di Aruba, unda un muhe hoben di 23 aña procedente di Hulanda a perde su bida.

    Mes ora despues di e accidente a cuminsa traha pa determina kico exactamente a pasa. Cuerpo Policial di Aruba a start e investigacion y despues esaki a bay den man di Koninklijke Marechaussee (KMar), mirando cu tin envolvimento militar.

   Mientras tanto famianan na Hulanda no kier kere e storia cu nan yiu muhe Kimberly van Ardenne di 23 aña tabata esun tras di stuur y cu tabata haci ‘maniobranan’ cu e vehiculo UTV aki.  Nan ta considera nan yiu muhe demasiado di caracter keto pa bay haci esaki, y casi no tabata maneha auto mes debi na anshamento cu e ta haya ora di ta tras di stuur.

   Pesey e pregunta ta, berdad e yiu muhe tabata na stuur of ta otro hende tabata coriendo.

   Riba Diabierna, Ministerio Publico di Aruba a duna comentario riba e asunto.  Y nan a indica cu un Team Forensico a bin Aruba pa yuda cu esaki.

   Segun Ministerio Publico, e investigacion ta wordo hiba door di Marechaussee bao autoridad di un fiscal specialisa na Ministerio Publico di Aruba. Marechaussee, via nan recherche di famia, ta den contacto estrecho cu famianan di e victima. Ministerio Publico di Aruba ta mantene e comunicacion cu nan abogado.

   E investigacion ta den pleno marcha.  No a menciona di unda e Team Forensico aki a bin pa haci investigacion, specificamente riba e estado tecnico di e vehiculo envolvi.

   Ademas Marechaussee a haci un yamada na testigonan y hendenan cu por tin informacion relevante pa sali pa dilanti. E parti di investigacion aki tambe ta andando.