ORANJESTAD (AAN): Aruba Bank a participa den e di 29 edicion di Ronde van Aruba cu un ekipo di damas “Women on Fire” cu a consisti di Roixian Oleana - Janzen, Nathalie Loefstop, Jenifer Salazar Restrepo y Ada Guerra.
E competencia di Ronde van Aruba ta consisti di diferente categoria, tanto individual como di ekipo manera duo, estafette of mixto. E ekipo di Aruba Bank a prepara nan mes pa asina por a participa den e Ronde van Aruba, cual a cuminsa diabierna anochi y termina diasabra mainta.
E ekipo a ricibi sosten di esunnan cu a acompaña nan den auto, kendenan tabata duna nan e animo pa sigui core pa asina termina e coremento di 72 KM.
Sostenedornan tabata para banda di caminda pa asina apoya e ekipo den e careda cu ta exigi hopi di e miembronan individualmente.
E competencia aki a exigi condicion fisico y energia di e participantenan. Aruba Bank ta orguyoso y ta felicita su ekipo cu a participa den Ronde van Aruba.
