Team di Calamidad di HOH a organisa tercer edicion beach tennis

Cu enfoke riba biba mas saludabel y crece como team di colega

ORANJESTAD (AAN): Recientemente team di Calamidad di Horacio Oduber Hospital, conoci como HVT a organisa e di tres edicion di Beach tennis pa coleganan di HOH. Un encuentro sumamente agradabel entre coleganan unda e enfoke tabata crece mas como team, socialisa pafo di ora di trabou, pero tambe inspira otronan pa hiba un bida mas saludabel. Un total di setenta empleado a participa n’e torneo di beach tennis y a parti e torneo den cinco diferente categoria entre coleganan cu a caba di cuminsa entrena y tambe coleganan cu ya tin hopi tempo ta hunga e deporte aki.

            Hulpverleneners Team (HVT) di hospital ta e comision tras di e organisacion di dieferente actividad cu ta tuma luga. “E evento a cuminsa cu registracion pa 5or di atardi, mientras pa 6’or e wegan dan a inicia. E competencia a bay bon, yena di ambiente unda competencia fuerte no tabata falta y tur hende a pasa hopi bon, asina Izania Wever, miembro di comision organisado HVT a duna di conoce.

            Wever a gradici un y tur cu a participa na e di tres edicion di beach tennis. Tambe a yama e ganadonan pabien di e diferente categorianan unda sigur nan a bataya fuerte pe titulo di ampeon y sub-campeon.

            Jacco Vroegop, director di hospital, a sigura cu e team organisado a traha duro na hospital e dianan tras di lomba pa a prepara pa e tormenta tropical y awo tabatin e weganan di HVT unda sigur nan a logra relaha. Pa algun aña caba e team di HVT ta organisa e weganan aki y banda di esaki ta organisa hopi masactividad. Ta agradabel pa mira hopi colega di hospital participa y ta spera di mira mas colega participa den eventonan deportivo.

            E director a enfatisa cu e ta masha orguyoso di mira su coleganan den accion riba cancha di beach tennis. “Mi a priminti nan cu otro aña mi tambe ta participa”, Vroegop a menciona. E ta entusiasma pa participa otro aña y mira con leu e ta yega.
Comision organisado ta desea di manda palabra di pabien na tur cu a participa y specialmente ne gadadonan di tur e categorianan. Un danki di curason na e sponsors cu un bes mas a kere den nos esta Oduber Agencies, Visser Trading y Martijn Trading.