Team Aruba ta participa den FIRST Global Challenge 2026 na Sur Korea

ORANJESTAD (AAN): Un biaha mas, The STEM Embassy ta orguyoso pa hiba un team di hobennan di Aruba pa representa nos isla na e FIRST Global Challenge 2026 na Incheon, Sur Korea, di 7 pa 10 di October. 

FIRST Global Challenge ta un competencia internacional di robotica unda hobennan di mas cu 190 pais ta reuni pa comparti nan conocemento, traha hunto y enfrenta un reto global por medio di STEM (Ciencia, Tecnologia, Ingenieria, Matematica), robotica y innovacion. 

E aña ki e team nacional di Aruba ta consisti di Ruarth Lampe (17), Brady Rojas Guerrero (17), Jerriq Tromp (17), Brooke Lockhart (16) y Gabrieli Angela (17). Despues di lunanan di preparacion, e team y nan robot ta cla pa e reto! E team ta hopi entusiasma pa representa Aruba y demostra loke nan a traha. 

E tema di e FIRST Global Challenge 2026 ta “Igniting Innovation”, unda ta enfoca riba con tecnologia y innovacion por yuda cu prevencion, mitigacion y recuperacion di incendio forestal. E aña ki ta marca e di cuatro biaha cu Aruba lo competi na e competencia ki.

Na FIRST Global 2025 na Panama, Team Aruba a logra medaya di brons y plata pa e Albert Einstein Award pa FIRST Global Internacional Excellence, e premio mas prestigioso di henter e competencia. 

Pa The STEM Embassy, e participacion di Team Aruba ta bay mas leu cu solamente e competencia. Esaki ta e di cuatro biaha cu The STEM Embassy ta representa Aruba na e competencia internacional di robotica unda nan a yega di bay Singapore, Grecia, Panama y  awor Sur Korea.

The STEM Embassy kier mustra hobennan di Aruba cu nan por soña grandi y cu STEM por habri porta pa nan. E experiencia aki ta duna nan no solamente conocemento tecnico, pero tambe confianza, teamwork, liderazgo y un perspectiva global.

A traves di programa como “FIRST Global Aruba”, “Ki’ ta bo STEM?”, “Ban Hisa nos STEM: Teacher Training”, The STEM Embassy ta continua su mission pa stimula curiosidad y crea mas oportunidad pa hobennan di Aruba den STEM.