Te hasta e caredanan na Palo Marga a wordo cancela debi na Stof excesivo di Sahara

Advertencia y precaucion pa esaki!

ORANJESTAD (AAN): Manera cu DIARIO a trece dilanti caba den su edicion di Diabierna, un advertencia ta wordo emiti debi cu tin stof excesivo procedente di desierto di Sahara, den atmosfera riba Aruba.

   E Santo aki di Sahara tabata situa na parti pariba di Caribe, y lo percura pa bista keda limita den e region pa awe Diasabra y Diadomingo tambe.

   Pues visibilidad ta keda reduci, cu biento cu de vez en cuando lo bay ta basta fuerte.

   Diabierna mes tabata dificil pa hasta mira Hooiberg, y demas lugarnan leu.  Esaki ta loke a pone cu e organizadornan di competencia di Dragrace e weekend aki na International Raceway Park Palo Marga a dicidi pa suspende e caredanan.

   Mientras tanto debi na biento fuerte, lama ta keda modera te basta bruto cu altura di olanan entre 4 y 7 pia.  E olanan di mas halto ta riba lama habri, y parti panort di Aruba.

   Pesey awor ta adverti comunidad maritimo cu ta subi lama, pa no aleha mucho di costa, ya cu e bista general lo ta limita pa santo di Sahara tambe.

   E presencia di stof di Sahara den atmosfera ta pone temperatura subi tambe.  Y e mihor conseho ta pa esnan cu ta hopi sensitivo pa stof, principalmente pashentnan di Astma y esnan cu tin Astma Cronico, pa mihor keda paden e dianan aki.  Of si acaso nan sali pafo, uza un tapaboca.

   Expertonan a indica cu e concentracion di stof di Sahara cu tin aworaki riba Caribe, lo bay keda asina pa awor.  Esey ta debi cu ta pronostica cu e patronchi di esaki lo extende te cu fin di September 2022.

   Awor bo sa e motibo di con bo auto ta sushando asina rapido e dianan aki, of di con bo wowo ta produci asina hopi lagrima.  Corda cu tempo ta calor, y bebe hopi liquido pa bo curpa keda bon hidrata.