Director di Dimas Kathleen Ruiz-Paskel:
ORANJESTAD (AAN): Faltando dos luna pa final di aña 2025, te cu 26 di October tabata tin un total di 20,979 peticion pa permiso na Departamento di Integracion, Maneho y Admision di Stranhero (Dimas). Director di Dimas, señora Kathleen Ruiz-Paskel durante un entrevista cu DIARIO a remarca cu for di e cantidad aki, 8.863 ta prome peticion, 7.772 ta prolongacion, 2.884 ta cambio y 1.478 cu ta haci peticion pa declaracionnan. Den un aña regular normal, Dimas ta atende 15 mil peticion. Pa e aña aki ya Dimas a surpasa e cantidad normal mientras cu ainda no a cera e aña.
Segun señora Paskel, esaki ta un aña particular y Dimas ta trahando riba tur locual ta peticionnan. E prome peticionnan di personanan cu ta na Aruba caba ta cay den e trayectonan un y cuatro. Trayectonan dos y tres ta trata di maneranan pa flexibilisa mercado laboral unda cu famianan por pidi y ta haya autorisacion pa por traha cu e permiso. Y tambe esnan cu tin mas di cinco permiso ta haya un permiso cu nan lo por traha cerca diferente dunado di trabou cu mas flexibilidad y den e funcion di nan escogencia.
Señora Paskel a agrega cu Dimas ta den contact cu tur gremio comercial y syndical y NGOnan pa haya un miho bista con e maneho aki ta afecta nan. El a menciona cu den e combersacionnan cu Dimas a hiba cu diferente gremio, ta nota cu nan ta positivo cu e medidanan actual di Dimas y tin e efecto cu nan ta desea. Periodicamente hunto cu Minister Arthur Dowers, ta evalua e maneho pa haya informacion si e maneho a yuda cumpli cu e demanda grandi cu tin, entre otro den e sector hotelero.
