Directora Desiree Thode-Helder:
ORANJESTAD (AAN) Señora Desiree Thode-Helder, Directora di Departamento di Adulto Mayor, den entrevista cu DIARIO a elabora tocante e necesidadnan cu tin, relaciona cu cuido pa nos adultonan mayor, y a toca un par di punto relevante.
Señora Thode-Helder a duna di conoce cu su Departamento ta canando den un forma di cooperacion cu tur esnan cu ta duna cuido, y esaki ta e miho manera cu nan por procede, pasobra Aruba ta un Isla chikito cu tin hopi adulto mayor, tin hopi necesidad riba e tereno aki, pero no por yega leu si nan no coopera cu otro.
“Ora cu nos a start oficialmente, nos a bin hunto cu e casnan di cuido mes, y esey nos ta haciendo regularmente, pa scucha di nan kico ta nan necesidadnan y e problemanan cu nan mes ta encontra, pero tambe pa alerta nan riba exigencianan di calidad, cu a caba di introduci.
Y ta importante tambe pa hisa e calidad di cuido pa nos adulto mayor, pasobra naturalmente, esey ta e exigencianan cu mester tin pa brinda e adulto mayor un calidad di cuido halto manera nan mester”, señora Desiree Helder a señala.
Pesey nan ta trahando hunto cu e departamentonan encarga, tambe cu Inspeccion di Salud, DAS, DVG y tambe pa forma parti di un grupo cu ta atende cu e problematica di adulto mayor. “Nos ta sinta tambe hunto cu Cruz Cora y cu Wit Gele Kruis, y tambe nos ta sinta hunto cu tur e dunadornan di cuido, cu ta duna cuido na cas, p’asina nos ta riba e mesun nivel y mesun entendimento di kico ta e necesidadnan di adulto mayor, pa nos traha hunto pa nos yega na esey”, señora Desiree Helder a relata.
Sigur tin puntonan di atencion y un di nan cu señora Helder a menciona ta cu mester mas lugar pa e adultonan mayor por distrae nan mes, actividadnan pa nan participa, loke ta hopi importante, den forma di pasadia unda nan por acudi, y haya asistencia di experto pa yuda nan. “Esaki ta un necesidad pasobra e personanan aki enberdad ta buscando actividad, pero no tur ora ta haya e bon caminda pa bay”, señora Desiree Thode-Helder a señala.
E di dos punto ta cu tin necesidad tambe di cuido na cas, pasobra e adulto mayor ta mustra boluntad pa keda mas largo na cas, pero e cuido no tur ora ta accesible. El a splica cu tin un necesidad grandi tambe cu bon diploma pa duna cuido na cas, y esey tambe nan ta ocupa cu ne.
