Segun Director interino di DTI, Richella Dorothal:
ORANJESTAD (AAN): Director interino di Dienst Technische Inspecties (DTI), Richella Dorothal, a informa cu no tin mas cita pa keur vehiculo di motor pa resto di aña 2026. Actualmente, e prome citanan disponibel ta pa fin di april 2027.
Segun Dorothal, e lista largo di espera ta relaciona cu e aumento den cantidad di peticion pa keuring, como resultado di e controlnan intensifica di Cuerpo Policial Aruba (KPA) y Departamento di Transporte Publico (DTP).
El a splica cu DTI a boga durante hopi aña pa controlnan mas estricto. Segun e cifranan cu el a menciona, anteriormente solamente cerca di 30% di e vehiculonan tabata wordo presenta pa keuring, mientras cu actualmente e porcentahe aki a subi te aproximadamente 70%. E aumento aki ta trece cu ne un demanda considera pa e servicio cu mester duna.
Dorothal a indica cu DTI ta atende diariamente e cantidad di vehiculo cu e departamento por procesa. Como parti di e esfuersonan pa atende e demanda, DTI ta habri tambe riba diasabra, specialmente pa truck y vehiculonan di transporte publico.
Adicionalmente, UTV y ATV cu durante hopi aña no a pasa pa keuring ta presenta awor, loke ta contribui na e aumento den demanda.
E director interino ta apela na tur ciudadano pa controla e fecha di vencimento di nan keuring y pa haci cita cu suficiente anticipacion. El a enfatisa cu, segun e ley vigente, tur vehiculo di motor mester tin un keuring valido. Segun Dorothal, DTI no por wordo teni responsabel pa boetnan ricibi pa falta di keuring.
Pa haci un cita, e interesado mester presenta personalmente na DTI cu un seguro di auto valido y e formulario di registracion di DIMP. E mesun documentonan mester wordo presenta atrobe riba e dia di e cita.
Pa vehiculonan di transporte publico, ta necesario pa presenta tambe un permiso vigente of un carta di DTP indicando cu nan ta den e proceso pa haya un cita pa keuring.
DTI ta atende publico di 8:00’or pa 11:30’or di mainta y di 1:00’or pa 3:00’or di merdia.
