Te ainda Aruba tin dos evento planea otro aña pa Carnaval

Minister di Cultura tin di sinta cu SMAC ainda pa evalua -- ORANJESTAD (AAN): Riba nos isla bo ta ripara cu tin un pregunta grandi ta circula entre otro via social media, riba kico ta bay wordo haci cu nos celebracion di Carnaval.

   Hopi carnavalista y sigur e bandanan den nos comunidad ta hopi pendiente pa haya sa si ta bay tin algo y kico e algo ey lo ta.  A tuma nota con recien na isla di Cayman Islands a organiza parada di Carnaval unda solamente hendenan vacuna por a participa aden.  Tambe den fin di siman tabatin parada estilo carnaval na Miami.

   Mirando esaki DIARIO a entrevista minister di Cultura y Finanzas Xiomara Maduro Diaranzon mainta.

   E mandatario a splica cu SMAC y Crisis Team a sinta hunto, unda cu e idea ta bay ta pa organiza algun evento di Carnaval.

“Ta bay ta dos evento cera, pa wak con e lo bay”.

Mi mes no a sinta cu SMAC ainda, pero mi a pidi Crisis Team pa cuminza acerca SMAC pa cuminza wak e ora ey kico ta e plannan cu tin pa loke ta Carnaval otro aña.

Manera mi a compronde, ta dos evento ‘pilot’ ta bay tin, pa wak si esakinan lo resulta, pa asina toch di un manera organiza Carnaval, segun e mandatario.

E minister a sigui bisa cu for di Crisis Team e tin cu haya e cuadra prome riba kico por y kico no por, pa despues sinta cu SMAC.

Maduro a indica cu te ainda dos evento cera ta locual ta den e posibilidadnan cu tin, pero ainda e no a haya e detayenan.

“SMAC a solicita si un reunion caba”, segun e minister.

DIARIO a puntra e mandatario cu si por ehempel e casonan di COVID den e lunanan cu bin baha bastante, lo por organiza un of mas parada chikito di Carnaval.

“E ta depende di hopi factor manera e cantidad di caso di contagio etc., pero Crisis Team tin cu duna un indicacion riba kico lo por y kico no por”.

Mi ta kere cu den esaki sigur ta bay hunga un rol e parti di e vacuna, pues sigur ta bay tin cu tene cuenta cu esaki.

Di otro banda, los di e reglanan aki, SMAC mester indica na nos si e gruponan di Carnaval ta cla pa un evento, pasobra no mester lubida cu e pandemia a trece cune su crisis financiero y nos tur sa cu Carnaval no ta barata, segun e mandatario.

El a sigui bisa cu mester tene cuenta cu e hecho cu e gruponan mester por organiza nan mes financieramente tambe, pero ta SMAC mester duna un indicacion si nan ta cla pa e parti aki.