Taxistanan den accion a manifesta for di trempan te atardi dilanti Bestuurskantoor

ORANJESTAD (AAN)—Dialuna mainta te atardi tabata tin accion di taxistanan, dilanti Bestuurskantoor, debi cu nan tin malcontento cu minister di Transporte, pa diferente motibo.

            Un di nan, segun señora Linda Orman a splica, pasobra nan a haci varios intento di haya un encuentro cu e minister Arends, titular di Transporte,  pero nan no a haya contesta nunca.

Unico vez cu nan a mir’e tabata ora e mandatario a haci un presentacion na Universidad di Aruba, pero e tabata tin su puntonan di agenda, tanto minuut pa cada un y despues a gewoon sali bay.

            Aworaki nan a bolbe pidi un meeting cu ne, pero no a haya, pero antayera nan a wak cu e minister a manda dos memorandum recordando cu e ta kita e derecho di vergunninghouders pa pasa e vergunning den famia, cu ta un derecho cu nan a adkiri desde aña 86-87. Orman a bisa cu e minister a yega gewoon kit’e lubidando kico ta e motibo, pero e taxistanan si tin motibo pa no kit’e.  Tur e taxistanan, el a indica, ta retrasa den pago di belasting no pasobra nan ta mal pagador, sino pa motibo cu nan no por paga via nan personal number debi na e sistema mes di belasting, pero nan mester warda te cu Hulanda bin pone presion riba Departamento di Impuesto.

            E ta bisa cu e minister ta pone su famia hereda su debe aki, anto con nan ta bay caba cu esaki, cu a wordo causa pa gobierno mes. E otro punto ta e aumento di cantidad di personanan. El a bisa e mandatario cu e mester haci esaki via Parlamento y no via un MB, y mester tin mayoria pa pase den Parlamento. E ta sinta cu coalicion, pa colmo, cu a bah'e na 2003 y awo el a subie bek.