Director di Aduana Ricky Croes:
*Tarifa ta keda mescos
ORANJESTAD (AAN) – Director di Aduana, señor Ricky Croes, den conferencia di prensa tocante e introduccion di BBO na frontera.
El a splica cu ora e ta referi na BBO, e ta referi na tur hunto (BBO, BAVP y BAZV). Manera ta conoci BBO a subi na cuminzamento di aña di 6% pa 7%, den cual e particion tabata 4% pa BBO, BAVP y 3% pa BAZV.
Pa dia 1 di Juli cu ta bay introduci BBO na frontera, e mesun tarifanan ta bay conta tambe pa e impuesto aki. Esaki pa motibo cu e mesun suma cu ta bay paga na entrada di e productonan importa, riba e mesun suma tin derecho riba un reduccion riba dje.
Tur e cambionan cu ta bay bin, mester wordo poni den ley, y asina ta bay cuminza tambe cu e ley di BBO na frontera. Cambionan cu a wordo haci pa e BBO na frontera a wordo haci den e BBO mes, pa asina duna oportunidad pa cobra e BBO na momento cu e productonan wordo importa.
Ken ta esunnan cu ta bay paga e BBO na frontera? Director di Aduana a bisa cu ta tanto e comerciantenan como e particularnan cu ta bay cumpra productonan den priva. Den e ley ta wordo parti si, pa motibo cu solamente e comerciantenan cu ta rebende nan productonan lo bay tin e derecho riba deduccion, na momento cu nan haci nan aangifte BBO na DIMP.
Esey ta nifica cu esun cu ta cumpra priva, por ehemplo den Amazon, no tin e derecho ey. Solamente esnan cu ta bay rebende tin e derecho di deduccion, el a reitera.
“Pa e BBO na frontera, nos lo bay uza e Douane Warder. E warder cu nos ta uza ta esun cu ta wordo calcula segun articulo 59 di nos ley, y e BBO tarifa lo bay keda mescos. Den e Ley di BBO lo bay wordo poni cu tur locual ta conta pa invoerrechten y accijns, full e proceso tur e ley, lo conta tambe pa BBO na frontera”, señor Croes a señala.
Pa loke ta e parti di Aduana, señor Ricky Croes a menciona cu e brokernan a haya les riba e wetgeving di Aduana, y nan sa ki e procesonan ta. Pues, tur loke ta wordo uza pa invoerrechten e mesun articulonan lo wordo uza tambe pa BBO na frontera.
El a agrega cu locual ta bay conta tambe pa BBO na frontera, ta e mesun sistema di 'bezwaren beroep' cu aworaki tambe ta conta pa invoerrechten y accijns, exencion y tambe dispensacion.
